Hostname: page-component-7b7567c8c-tnkh4 Total loading time: 0 Render date: 2026-11-16T23:54:54.379Z Has data issue: false hasContentIssue false

IV Wenlok's Household Ordinances

Published online by Cambridge University Press:  21 December 2009

Extract

Wauter par la grace Deu abbe de Westm', a tuz ses leals, saluz. Pur co qe necessarie est a checun home qe doit hostel tenir qe il eit certein ordre pur la garde de son hostel e son honor meintenir, voloms e ordinoms qe le ordre desuz escrit soit en [tuz] poinz en nostre hostel meintenu. Primes qe nus eoms certeins recevours de nos deners en gros des baylifs e des provoz de totes noz teres. E qe eels facent tayles vers les baylifs e vers les provoz de checune receite par soy, issi qe ren ne soit livere en chef fors a els, e qe nule tayle de liveree sur aconte des maners desoremes soit alowee fors qe les tayles des avantdiz recevours. E qe eels recevours ne facent nule liveree fors par nostre lettre patente. E qe les gardeins de nostre hostel prengent de eels recevours en grosses sommes deners pur fere les purveances de nostre hostel solom co qe il verront qe plus soit a nostre profit. E qe les chef recevours prengent de checune liveree qe il front as gardeins de nostre hostel tayle qe il unt tant receu pur les despens de hostel. E qe il pusent par cele tayle estre sur lor aconte resonablement chargez. E qe les despens de hostel soient acontez devant les gent de offices checune nuit en la presence le senescal del hostel, le quel avera contreroule de totes les despenses ausi ben de chambre com del hostel. E sil avenge qe le senescal del hostel soit nule part hors par nostre conge ou par nostre comandement, qe le roule del hostel soit clos desuz son sel deks a son revenir, denz quel tens soient entrez les despens del hostel devant les genz de ofices en un roule par soy. E a revenir le senescal soient eels despens examinez e entrez en le roule principal, issi qe ren ne soit entrez en le roule principal fors en la presence lavandit senescal, quel roule soit ensele checune nuit apres laconte du sel le senescal. Estre [co] voloms e ordinoms qe par le conseil de nos senescals des teres e de nostre hostel soient les purveances fetes e les acrez en les maners ou nus bioms a sorjorner solom co qe il verront qe plus soit a nostre honor e a nostre profit. Estre co voloms qe nostre senescal des teres face pleinement son ofice de hors sicom apent e qe il eit apres nus meigmes les comandemenz parmi nos maners e qe tuz les baylifs e provoz soient a ly entendanz.

Access options

Get access to the full version of this content by using one of the access options below. (Log in options will check for institutional or personal access. Content may require purchase if you do not have access.)

Article purchase

Temporarily unavailable