1. The duc de Guise and cardinal de Lorraine to Marie de Lorraine, regent of Scotland, Vendôme, 19 February 1559/1560Footnote ¹

Copy: BL Cotton, Calig. B IX, fo. 94; decipher: TNA, SP 70/11, fos 55, 59

Summary: Cuisiat, no. 631; CSPF, II, nos 746–747; H. de La Ferrière, ‘Premier rapport sur les recherches faites au British Museum et au Record Office relatifs à l’histoire de France’, Archives des missions scientifiques et littéraires, series 2, vol. 5 (1868), pp. 329–330, 333 (part of the postscript, wrongly dated April 1560)

Madame, nous avons faict tout ce que nous avons peu pour vous tenir advertie de noz nouvelles et si noz depesches ont peu aller iusques à vous sans fortune nous sommes asseurez que vous avez bien entendu l’ordre que le Roy a donné pour vous secourir et sceu aussi comme le temps contraire a ramené nostre frere mons^r le marquisFootnote ² et tout son equippage à Diepe, où il a esté constrainct faire long seiour pour se r’equipper et attendre le temps propice, comme il est encores à present, dont nous avons ung incroyable regret pour la faulte que [ce sera] aux affaires de delà. Ce pendant le Roy a faict ce qu’il a esté possible pour entretenir la Royne d’Angleterre et garder qu’elle n’entrast en la jalousie, et aussy pour l’asseurer de l’amitié et de la bonne paix qu’il desire continuer avecques elle, affin qu’elle ne se laissast pas aller aux rebelles d’Escosse et persuader de les secourir de peur que cela ne nous tirast hors de la bonne intelligence que nous avons ensemble. L’ayant tousiours asseuré que ce nous faisons passer de force en Escosse n’estoit que pour y recouvrir l’obeyssance, ce qu’elle a monstré recevoir de bonne part et donne à [nostre] ambassadeur les plus honnestes parolles du monde, comme elle faict encores tous les jours. Toutesfois on a veu que par soubz main elle a faict ausd. rebelles toute la faveur qu’elle a peu, baille l’argent, envoye forces sur la frontiere de delà, grans preparatifz par mer, et beaucoup d’aultres choses bien monstroyent qu’il y avoit du poison caché. Dont, quant on faict remonstrance elle s’est tousiours excusé que ce n’estoit que pour la seureté de son royaulme, ce que le Roy a monstré croire et dissimule autant qu’il a peu, pour ne donner à cognoistre que l’on se defiast aucunement. Et ce pendant se hastoit le partement de [nostre] frere. Durant ces entrefaictes le Roy a eu infiniz adviz que pour certain elle avoit deliberee ausd. rebelles de tout ce qu’elle pourra et ne permectra point qu’il se face Roy absolut pardelà, empeschant que nostre frere ne nul aultre secours ne y passe, ne aussy que nous / en ayons aulcunes nouvelles. Ayant deliberee comme nous sommes advertiz de divers lieux et certains, que les navires qu’elle a faict mectre dehors, qui sont au nombre de trente pour le moins sont à la mer dedans le far d’Escosse departiz pour empescher le passage de nostre frere, ausquelz sont ioinctz huict ou neuf aultres vaisseaux des rebelles d’Escosse et quelques ungz d’ung Anglois [Escossois] qui se dit banny, et qui tient la mer, tous lesd. vaisseaulx fort bien pourveuz et esquippez de gens de guerre iusques au nombre de vj ou vij mille. Davantage, que du costé de la terre le duc de Norfort et my Lord Gray sont venuz vers Berwick avecques viij ou ix mille hommes, qui n’est pas pour y riens faire. D’ailleurs avons seur advis que lad. Royne à l’ayde du duc Adolphe de HolstenFootnote ³ oncle du Roy de Dannemarcq qui est son pensionnaire à mectre sus et luy tragecter sur la frontiere de Hesse xxiij enseignes de lansquenetz. Toutes ces choses, Madame, avecques beaucoup d’aultres sinistres deportementz font croire au Roy qu’elle a envye de faire pis qu’elle ne dict, et qu’il y a de l’ordure. Et pour autant que nous n’aurons point de voz nouvelles, et ne vouldrions inconsiderement hazarder le passage de nostred. frere s’il estoit ainsy que lesd. forces feussent dedans led. far, et en deliberation de le vouloir empescher, joint que nous voyons le temps disposé à n’estre pas bien pour sond. passage de douze ou xv jours, sachant que les chemyns sont tous bouchez, nous avons advisé hazarder ce porteur par Flandres pour vous porter ceste lettre, et vous advertir de tout ce que dessus. Vous pryant, Madame, le nous renvoyer le mesme chemyn en extreme diligence et par luy ou aultre, et par diverses personnes nous faire sçavoir en quel estat sont voz affaires, ce que vous sentez et cognoissez de l’intention et volunté des Anglois et des preparatifz et moyens qu’ilz ont sur la frontiere, si lesd. vaisseaux sont / ainsy en qu’ilz auront au passage de nostred. frere aussy de toutes aultres choses concernans le faict et service du Roy en cest endroict, et le bien de vosd. affaires pardelà, semblablement comme toutes choses y soit passees depuis le pertement du courrier Protestant affin que suyvant cela nous disposions noz affaires, et vous puissions tant mieulx pourveoir comme le Roy desire. Sur tout, madame, vous considerez combien il est necessaire, si ia n’a esté faict, que vous ayez le chasteau de Lislebourg auquel nous jugeons d’icy que gist la seureté principalle de vozd. affaires, et ne fault pardonner à riens pour y entrer, qui nous faict vous pryer ainsy que le Roy nous a commandé donner ordre qu’il y soit faict tout effort. Le Roy ne vous escript point, n’ayant voullu charger ced. porteur d’aucune aultre lettre pour le danger, et vous en est envoyé ung semblable par aultre main affin que d’ung costé ou d’aultre puissiez avoir cest avis et nous de voz nouvelles que vous pourrez addresser à nostre ambassadeur en Flandres, estimant que c’est à ceste heure le plus seur chemyn. Et pour fin de ceste lettre nous vous dirons que graces à dieu toute ceste compaignye faict fort bonne chere, et prions dieu que ainsy soit il de vous et vous donne, Madame, tresbonne et treslongue vye. De Vendosme le xix^me jour de febvrier 1559.

Postscript : Madame, nous vous pryons tant que nous pouvons nous advertir estant ce chemin du Petit Lit fermé s’il y auroit moyen et seureté de vous secourir di costé de Dombartran ou d’ailleurs et quoy qu’il y ayt ne laysser point perdre de temps à faire mectre led. lieu du Petit Lit en meilleure seureté et fortification qu’il n’est, car noz advis portent que les Anglois s’y veullent attacher. Sy vous veoyez les choses en mau[vais] chemyn que nous craignons, le mieulx que vous sçaurez faire pour rompre ceste furye c’est d’accorder avecques les rebelles, les laissant vivre comme ils sont, pourveu qu’ils demeurent en l’obeyssance du Roy et de la Royne vostre fille, leur donnant esperance que se comportant doulcement en ladicte obeyssance, vous ferez que l’on retirera de delà cy apres la plus grande partie des François qui y sont, et tout soubz le bon plaisir du Roy. II n’y a en cest endroit, Madame, si nécessaire à faire que de gaigner temps, et ne seroit point mauvais que, pour mieulx disposer et advertir voz peuples, vous feissiez par petitz livretz publier que les Anglois ont accordé avec les rebelles de les faire reduyre en leur obeyssance.

Sy n’ayant que faire, madame, du sieur de la Brosse puis qu’il a passeportz de la Royne d’Angleterre de retourner pardeça par terre, il vous sembloit bon d’essayer de le faire passer au travers de son royaulme, il apprendroit beaucoup de choses, et si nous rendroit compte de tout ce que nous desirons sçavoit. Donnez ordre s’il vous plaist, Madame, que nous sachions par la premiere despesche le nombre des François quy sont pardelà tout ce qu’il fauldroit pour remplir les bandes d’autant qu’il s’en est beaucoup perdu, à ce que nous avons sceu.

C. Car^al de Lorraine Fran. duc de Guise.

2. Francis II to Marie de Lorraine, Amboise, 7 March 1559–1560

Copy: AE, MD Angleterre 15, fo. 66r

Madame ma bonne mere, pour le desir que j’ay de veoir clair aux troubles qui sont pardelà et y mectre une fin s’il est possible, je depesche l’evesque de Valence conseiller en mon conseil privé, present porteur devers la Royne d’Angleterre et delà pardevers vous pour les causes et ainsi que vous entendrez de luy, qui vous sçaura bien rendre compte de tous ce que je vous sçauroye escripre des nouvelles de deça, dont je vous prie de croire tout ainsi que ferez moymesmes, qui prye dieu Madame ma bonne mere vous avoir en sa tressaincte et digne garde. Escript à Amboise le vije jour de mars 1559.

[ainsi signé de la main du Roy] Vre bon filz,

FRANCOYS

3. The duc de Guise and cardinal de Lorraine to Marie de Lorraine, Amboise, 7 March 1559/1560

Copy: AE, MD Angleterre 15, fo. 66v

Summary: Cuisiat, no. 637

Madame, l’evesque de Valence s’en allant par delà pour l’occasion que vous sçaurez de luy, nous remectrons toutes choses à sa suffisance, et vous dirons seulement que depuis l’arrivée du s^r de Rubay, nous n’avons eu aucunes nouvelles de vous sinon celles que apporta le courrier Protestant. Et depuis le jeune Escossoys depesché du x^me du passé, dont nous avons esté en grande peine, comme nous estimons que vous avez esté des nostres. Si vous asseurons nous bien qu’il n’a pas tenu à souvent vous avoir escript. Mais s’il plaist à dieu que les choses passent aussi doulcement que nous le desirons et esperons, il y aura moien d’en avoir plus souvent, et de vous veoir pardecà aussi tost que la commodité le pourra porter. Ce pendant nous nous recommandons treshumblement à vostre bonne grace et pryons dieu, Madame, vous donner tresbonne et treslongue vie. De Amboise le vij^me jour de mars 1559.

[Et bien bas est escript et signé] Voz treshumbles et tresobeissans freres,

C. Card^al DE LORRAINE, FRANCOYS DE LORRAINE.

4. Mary queen of Scots to Marie de Lorraine, [Amboise, 7 March 1559/1560]

Copy (of autograph): AE, MD Angleterre 15, fos 66v–67r

Madame, je n’ay voulu perdre ceste petite occasion de vous faire ce mot seulement pour me ramentevoir à vostre bonne grace et vous asseurer de la bonne santé du Roy et Royne et tous mes oncles et parens et amys, me remectant à vous escrirer plus au long de toutes nouvelles par monsieur de Vallence lequel sera demain depesché pour vous aller trouver. Je m’asseure que vous serez bien advertie des nouvelles que nous avons eues de la grande demonstration que faict le Roy d’espaigne de ne vouloir en rien favoriser les rebelles, mais plustost

5. Mary queen of Scots to Elizabeth I, [7 March 1560]

Original: TNA, SP 70/14, fo. 6

Madame ma bonne seur, saichant que le Roy monsiegneur depeschoit devers vous l’evesque de Valence conseiller en son conseil privé, pour choses concernans le bien et entretenement de la bonne paix et amytié qui est entre nous, je n’ay voulu que ce fust sans ceste lettre de moy, l’ayant chargé vous visiter de ma part et dire aucunes choses, dont je vous prye le croyre tout ainsi que vous feriez la personne mesmes de,

Vostre bonne sœur et cousine,

MARIE.

6. Catherine de Medici to Elizabeth I, [c.7 March 1560]

Original: TNA, SP 70/14, fo. 7

Printed: LCM, I, p. 132

Madame ma bonne seur, allant l’evesque de Valence, conseiller au conseil privé du Roy mon filz, pardevers vous, pour l’occasion que vous entendrez, je n’ay voulu que ce fust sans ceste lettre de moy, luy ayant donné charge de vous visiter de ma part et dire aucunes choses, dont je vous prye le croyre tout ainsi que vous feriez la personne mesme de

Vostre bonne seur et cousine,

CATERINE.

7. The duc de Guise and cardinal de Lorraine to Marie de Lorraine, Amboise, 12 March 1559/1560

Copy: AE, MD Angleterre 15, fos 72r–73v; intercept in cipher: TNA, SP 52/2, fo. 82

Summary under the date of 20 March: CSPF, II, p. 460, nos 879, 880 (translation in TNA, SP 52/3, fos 141–142)

Summary: Cuisiat, no. 640; CSP Scotland, I, no. 685

Madame, ce porteur a faict fort bon debvoir de nous rendre voz lettres dont nous avons eu tresgrand plaisir, pour avoir seulement par icelles entendu de voz nouvelles, d’autant que nous avions esté sans en avoir depuis l’arrivée du courrier Protestant.Footnote ⁴Et depuis ce temps là nous a la Royne d’Angleterre tousiours tenus en alarme d’y vouloir recommencer la guerre, et monstré par tous ses depportemens qu’elle avoit envie de remuer mesnaige, croyans qu’elle n’a riens obmis pour penser tirer quelque fruict de sa mauvaise volunté si elle trouve les choses disposées pardelà pour faire ses / affaires. Toutesfois, elle nous a donné tousiours les plus belles parolles du monde, surquoy le Roy ne s’est pas tant reposé qu’il n’ayt adverty le Roy d’Espaigne de tout ce qu’elle faisoit. L’ayant bien consideré, a faict responce que tant s’en fault qu’il vueille approuver ses desseings mesmement d’entreprendre quelque chose de vostre costé, que pour chastier les rebelles, il bailleroit au Roy tant de vaisseaulx, de gens et de vivres qu’il vouldroit. Et en a escript de telle sorte à lad. royne, que cognoissant qu’elle ne pouvoit rien esperer de son costé, elle a commancé à parler autre langaige, et faict dire par son ambassadeur que ce qu’elle a faict n’a esté que pour la jalousie de son royaume et craignant estre surprise, de facon qu’il semble qu’elle se repente de s’estre tant advancée. Et croions que avant que vous aiez ceste lettre vous aures bien cogneu que ses intentions sont fort refroidis, et si ce qu’elle nous a faict dire par sond. ambassadeur est vray, aurez sceu toute l’histoire par ung homme que le chevalier Seure ambassadeur du Roy en Angleterre vous aura envoyé. Neantmoins à toutes adventures nous avons bien voulu vous renvoyer ced. porteur par la voye de Flandres pour vous advertir que nous estimons que voz rebelles se trouveront bien loing de leur compte s’ilz se fondent en la protection de lad. dame, ou qu’il y a beaucoup de dissimulation. Et neantmoins que le Roy sachant comme il se fault fyer aux Angloys ne laisse pas de faire preparer vingt quatre gros navires pour (s’il est besoing et l’on voye / que lad. dame continue sa mauvaise volunté, avecques les autres forces qu’il tient prestes) donner tel ordre à vous secourir qu’il aura la raison qu’il desire des ungs et des autres. Ce pendant il a depesché l’evesque de Valence conseiller en son conseil privé, pour aller devers lad. Royne, sçavoir clerement son intention et si elle est bonne passer jusques à vous avecques bons et amples memoires pour essaier d’appaiser les choses de vostre costé, et trouver moyen de gaigner temps. Tout ce qui nous deplaist, madame, est le moien qui nous est empesché de vous faire secourir de deniers aussi promptement que nous sçaurons que vous en aiez besoing, lesquelz nous n’avons ausé hazarder ny nostre frere mons^r le marquis aussi pour le danger evident qui y estoit. Mais il ne peult gueres tarder que n’y voyons quelque chemin ouvert. Et pouvez estre asseuree madame que n’y perderons ung seul quart d’heure. Or il fault que avecq vous nous plaignons le mal que peult apporter en ung roiaume le faict de la Religion qui a tellement cheminé de deçà que depuis douze ou quinze jours s’est descouverte une conspiration faicte pour nous tuer tous deux, et apres prandre le Roy et luy bailler des maistres et des gouverneurs pour l’instruire et dresser à ceste meschante doctrine. Et pour cest effect se debvoient assembler icy autour ung nombre infiny de personnes qui ne sont pas sans appuy d’aucuns grans, et entre le vj et xv^me de ce moys executer cela de sorte que sans la grace de dieu et les advis que nous avons euz de tous les costez de la Chrestienté et aucuns des / conjurés aussi qui se sont venuz descrouvrir, la chose eust sortiz effect.Footnote ⁵ Mais nostre seigneur y a pourveu, les choses descouvertes et beaucoup de prisonniers, desquelz, et d’autres que l’on espere recouvrer, la chose sera du tout veriffiée, et le mal evité, dont et de ce qui s’en trouverra vous serez plus particullierement advertye cy apres, mesmement si le chemin se faict plus libre qu’il n’a esté par cy devant. Et en attendant vous recevrez s’il vous plaist nos treshumbles recommendations à vostre bonne grace, priant dieu Madame vous donner tresbonne et treslongue vie. D’Amboise le xij^me jour de mars 1559.

[et plus bas y a :] Montaignac est presentement arrivée, sur la depesche duquel sera incontinant prins resolution.

[ainsi signéz :] Voz treshumbles et tresobeissans freres,

C. car^al de LORRAINE, FRANCOIS DE LORRAINE.

8. Instructions of Jean de Monluc, bishop of Valence, for negotiations with Elizabeth I, 25 March 1560; extractsFootnote ⁶

Copy: TNA, SP 70/12, fo. 104

Pour la charge d’Escosse

Desirant que lad. dame Royne regent face tant de son costé qu’elle puisse ramener lesd. rebelles, aiant led. evesque de Valence charge tresexpresse de sa majesté de les asseurer que comme prince begnin et clement, et la Royne sa femme aussi trespitoyable et misericordieuse seront contens d’oublier les faultes qu’ilz ont faictes et les rappeller et remettre en leurs bonne graces en retournant à eulx et satisfaisant au debvoir et à l’obeissance qu’ilz leur doyvent, et le trouveront tousiours si bon prince et si favorable qu’ilz auront occasion de tant plus plaindre et regretter leurd. faulte.

Fin du iije article

Auquel les occasions qu’il verra à l’œil donneront moien d’effectuer ce que le Roy desire qu’il face par delà, qui est de paciffier les choses s’il est possible et ne poinct craindre, avec lad. Royne Regente leur donner certaine asseurance que l’obeissance rendue, et qu’ilz se seront recongneuz, sa majesté sera contente de retirer de là, la plus grande partie des forces qu’il y a.

‘envers la Royne d’Angleterre’

La dessus icelluy evesque de Valence luy dira que le Roy qui a accoustumé et desire ne cheminer point en tenebres, luy a donné charge luy faire entendre qu’elle est son intention et comme elle desire vivre avecques luy, la suppliant estre asseuré que le plus grand desir que le Roy ait en ce monde est de continuer avecques elle l’amytié commencee et observer ce qu’il doibt en son endroict, voulant luy lever tout scrupule et doubte qu’elle pourroit avoir de luy et de ses actions et mesmement des forces qu’il a en Escosse. Car il a charge si elle luy veult donner libre passaige et l’asseurer de sa droicte intention aller en Escosse et là faire entendre aux rebelles que encores qu’ilz aient tant mespris à l’encontre de luy et la Royne sa femme leurs souverains seigneurs, il est content les recevoir en sa bonne grace et oublier toutes les faultes passees moienant qu’ilz se repentent et retournent à la vraye obeissance qu’ilz luy doyvent, ce qu’est asseuree, sa majesté s’accommodera de retirer de là la plus grande partie desd. forces et se contentera de y en laisser ce qui sera convenable pour la seureté de ses affaires, par où lad. dame Royne d’Angleterre sera hors de la deffiance qu’elle dict avoir d’estre invahye en ses pays de ce costé là.

9. Marie de Lorraine to the duc de Guise and cardinal de Lorraine, Edinburgh, 27 March 1560

Copy (intercept): BL, Cotton, Calig. B IX, fos 99v–100r

Messieurs mes freres, ceste cy est le quatriesme despesche que je vous ay faicte d’une mesme chose depuis la reception des deux vostres, l’une du dixneuf et ving troisiesme du passé par trois divers endroitz et l’aultre du xxviij^e par lesquelles me mandez les preparatifz qu’avez faictz pour le passage de mons^r le marquis nostre frere, qui ont tresmal reuscy, de quoy il me desplait grandement. Quant aux desportemens de la Royne d’Angleterre je vous ay adverty journellement des forces qu’elle a en ce Firth et sur la frontiere qui augmentent d’heure à aultre, et ne fais doubte que à l’arrivee du s^r de MontignacFootnote ⁷ devers vous il ne vous ait fait ample rapport de toutes choses selon son instruction, et ce qu’il aura appris en son passage. L’ambassadeur Sevre a tresmal pris le blanc scellé du duc et pour vous declairer que c’est : l’ayant recherché par tous moyens pour le reduire, et luy contynuant de mal en pis, et voyant qu’il estoit prest d’accorder avecques la Royne d’Angleterre pour mectre les choses en longueur et luy en soupeson, fut envoyé led. blanc et une lettre, lequel on a fait remplir dont led. duc n’a aulcune cognoissance, les ayant recouvert avecques ung aultre blanc que j’ay encores, semblable de quelque ung de mes serviteurs heritier du feu evesque de Rosse et vouldrons que l’ambassadeur eust suyvy en cella l’instruction qui luy en avoit esté envoyé, vous asseurant que ny au duc ny aux aultres il n’a / esté oublié ung seul moyen qui peult servir à les reduire à l’obeyssance du Roy et de la Royne, et y ont esté faictz tous offices possibles par ceulx qui sont icy. Et pour ce que desirez sçavoir quel moyen il y a de nous secourir veu l’empeschement de la mer, nous n’en veoyons ung plus expedient que d’envoyer par le West à Saint Jehan d’AirFootnote ⁸ et maison du conte de CasselzFootnote ⁹ nommee DoneureFootnote ¹⁰ qui est à deux miles pres et advertir led. Conte sans mectre riens à terre ny en la mercye des hommes iusques à ce qu’on aura de mes nouvelles où je m’essayera d’envoyer des forces pour conduire ce qu’il plaira au Roy m’envoyer. Et en cella ne se peult riens hazarder que l’argent avecques eux ou trois navires bien avitaillez et muniz de toutes choses, mesmement de farines qui serviront de l’otage et à nourrir la force que je y envoyeray pour le temps qu’ilz seront là. Et si cas advenoit (que Dieu ne veulle) que les Anglois fussent icy par terre et que l’on n’y peult mener forces, lesd. navires seront quictes pour retourner. Il est vray que ce moyen n’est sans danger mais il me semble et par le conseil que ie ay trouvé que c’est le moindre. Vous y adviserez et en ferez pour le mieulx, car nous sommes en tresgrand necessité d’argent et est tout nostre credit perdu. Et quant à l’escrit de la fortiffication de Petit Lith,Footnote ¹¹ des gens de guerre, vivres et aultres munitions, Mons^r de VilleParisisFootnote ¹² vous en escript, vous asseurant Messieurs mes freres, que l’on faict tout ce qu’il est possible pour le conserver et durer le plus longuement que l’on pourra en attendant le bon plaisir du Roy. Quant aux articles, je estime bien que l’ambassadeurFootnote ¹³ les a envoyez pour se prevaloir du temps, mais je n’ay jamais veu chose si indigne tant pour l’honneur de Dieu que la reputation du Roy. En les accordant il ne resteroit plus que rendre l’obeyssance à la Royne d’Angleterre. Led. ambassadeur me mande que c’estoit la volunté du Roy. Il me semble qu’il y a de choses qui meritent estre bien considerees et n’ay veu chose pardeça qui m’ait donné plus de tourment que cella et eusse esté surprise qui estoyent en partie sans chiffre. Et me recommandant humblement à voz bonnes graces etc De Edimbourg le xxvij^e de mars 1560.

10. Jacques de La Brosse and Nicolas de PellevéFootnote ¹⁴ to the duc de Guise and cardinal de Lorraine, Edinburgh, 27 March 1560

Copy (intercept): BL, Cotton, Calig. B IX, fo. 98v

Messeigneurs, parce que la Royne vous a faict ample responce aux deux lettres qu’elle a receu qui est tout ce que avons eu de vous depuis la venue du s^r Octavien,Footnote ¹⁵ ne vous en ferons autre redicte et aussy que Mons^r de VilleparisisFootnote ¹⁶ vous escript bien au long tant de l’estat des fortiffications que des vivres. Et suyvant ce qu’il vous a pleu escrire par l’une de voz dictes lettres, je La Brosse espere partir dans quatre jours et pour ceste effect ay envoyé devers le duc de Norfolk qui est sur la frontiere pour estre asseuré de mon passage, encores que j’aye ung saufconduict de la Royne sa maistresse. Ne voullant faillir à vous dire encores particulierement qu’il n’est riens obmis de tout ce qu’il a esté possible pour mectre la Royne d’Angleterre hors de suspition d’entrer en la guerre, et pacifier les rebelles qui ont tousiours insisté comme ilz font encores de veoir le Roy pardeça sans fortiffication et gens de sa nation. Mess^rs, nous supplyons Dieu etc. De Edimbourg le xxvij mars 1560.Footnote ¹⁷

Messeigneurs, la Royne douagiere vous escript pour les expeditions de l’evesché de Rosse en faveur du doyen de Glascou qui est president de la Session.Footnote ¹⁸ Son age et fort bonne vye et emynent sçavoir le recommandent assez et n’avons voulu faillir à vous en porter sa tesmoignage et vous dire qu’il est bien affectioné et bien necessaire par deça. L’evesché est encores entrer.

Depuis ceste lettre escripte est revenu de devers le duc de Norfolk la trompette n’ayant led. duc voullu accorder seureté de mon passeport sans premierement en avoir adverty sa maistresse. Je ne sçay ce qu’il y en adviendra. Vous m’avez faict promesse et asseurance avant mon partement et depuis par lettre qu’il vous avoit pleu escrire par deça Monsigneur le cardinal, d’un office de conseiller pour mon nepheu dont il n’a obtenu expedition comme il m’a escript. Je ne [sçay] quelle faulte luy ou moy pourrions avoir commis pour n’en avoir eu la despesche.

Voz treshumbles et tresobeissans serviteurs,

DE LA BROSSE. N. E. D’AMYENS.

11. Henri Clutin, sieur d’Oysel, to the duc de Guise and cardinal de Lorraine, Dunbar, 27 March 1560

Copy (intercept): BL, Cotton, Calig. B IX, fo. 99r–v

Messeigneurs, vous vous trouverez amplement adverty de l’estat de toutes noz occurrences par la lettre de madame la Royne vostre soe[ur]. Par ceste cy je vous diray tant seullement Messeigneurs que la necessité est fort grande parmy noz gens, mais le courage ne leur fault pas, ausquelz tout ce que nous pouvons faire au monde pour les nourrir est de leur prester huict ou dix solz par sepmaine et encores avons nous peur que ce moyen nous faille à la fin de ce mois ou au commencement de l’aultre, et nous contraigne d’entrer à manger noz vivres que j’ay espargné iusques icy le plus qu’il m’a esté possible pour filer plus longuement et avoir de quoy faire plus de service au Roy au besoing qui s’en pourra offrir bientost. Il est vray, Messeigneurs, que vous sçavez assez considerer que noz soldatz souffrent beaucoup estantz toutes choses encheryes de la moityé depuis deux mois en ça, et malaisees à recouvrir. Mais aussy durerons nous, dieu aydant, avecques nozd. vivres deux bons mois et demy à commencer du jour que nous y mectrons la main, en quoy s’entende que nous aurons du pain assez raisonnablement, fort peu de vin et breuage du pays sinon pour les plus apparentz et quelque petite commodité de poissons et chairs sallees. Au regard de la fortiffication de Petit Lyth nous faisons toute extreme dilligence de l’advancer, sans oublier de faire tousiours par mesme moyen quelque despence pour la conservation et seureté de Dombar qu’il n’en a peu de mestier. Quant à artillerye nous en avons assez pour les places que nous gardons si elle estoit bien montee, de grosse pouldre aussy mais de menue grenee dont il a pleu au Roy et à vous, Mess^rs, nous envoyer six milliers dernierement par le s^r Octavian, il ne nous en reste que deux, ayant esté le demeurant employé et delivré parmy les bandes aux affaires qui soit [sic] passees, avecques quatorze cacques qui se perdirent et furent prinses par les Anglois à leur arrivée en ce Firth, que je regrette infiniment, pour estre chose fort necessaire et dont il ne se peult faire en ce pays. Pour cella nous n’esperons de demeurer toutesfois ains essayer à tousiours quelque petit service iusques à toute extremité dieu aidant si la necessité le requiert. Estans tous noz cappitaines et soldatz iusques aux moindres de ceste bonne devotion. Sur quoy je vous advoue[?] Mess^rs que nous avons perdu quelques hommes dont noz bandes peuvent estre aulcunement diminuees mais non pas de bien grand cyo. [sic] / les ungs s’estans desrobbez par pauvreté, les autres de lascheté de cueur, qui se sont allez rendre à ces rebelles. Quant à prisonniere il n’y en a peu des nostres, si ce n’est de ceulx qui furent pris sur les frontieres par lesd. Anglois. Mess^rs je supplye le createur etc. De Dunbar le xxvij^e de mars 1560.

Mess^rs ayant la Royne icy nous y eussions plus longuement seiourné et poursuyvy aultres entreprises sans la consideration des nouvelles qui courrent tousiours du costé des Anglois. Ceste lettre a tant tardé à s’en aller que nous sommes advertiz qu’il y a desia ung nombre d’enseignes logé et campé pres Barwik du costé de deça et par tous noz advertissementz il s’entend que toutes leurs forces de gens de cheval et de pied commenceront au jourd’huy à marcher.

Vre treshumble et tresobeissant serviteur,

CLEUTIN.

12. Nicolas de Pellevé to the cardinal de Lorraine, Edinburgh, 27 March 1560

Copy (intercept): BL, Cotton, Calig. B IX, fo. 93r–v

Printed (with errors): H. de La Ferrière, ‘Premier rapport sur les recherches faites au British Museum et au Record Office relatifs à l’histoire de France’, Archives des missions scientifiques et littéraires, series 2, vol. 5 (1868), pp. 330–331

Monseigneur, par la despesche du sieur de Montignac et celle que l’on a donnée à Octavian, laquelle il a baillée à ung marinier pour la crainte qu’il avoit, ainsy qu’il nous a mandé de Donbarre, sans se voulloir embarquer pour la crainte qu’il avoit d’estre surpris, j’estime que serez bien adverty des affaires de pardeçà, avec ceste despesche l’on a eu peine d’entretenir les bons par la voye que l’on pensoit leur estre plus agreable et meilleure, et aux aultres l’on a usé de tous moyens possibles pour les separer et leur donner esperance de retourner en la bonne grace de leurs souverains. Et ont esté meslees toutes les practiques dont l’on s’est peu adviser. Neantmoins leur malice a toujours esté pardessus, et nommement la demande de veoir les François hors de ce Royaulme et demolir le Petit Lith. Leur repentance suyvoit de bien pres le peché, sans la pratique des Anglois qui estoit la seule occasion qui nous mouvoit de les rechercher par doulceur et persuader à l’obeyssance, où la Royne a usé de tous les remedes, voires jusques à leur en promettre particulierement recompense ; et pour faire inclyner le duc en cette opinion et le mectre en suspecion de l’aultre part, l’on print occasion de son blanc seellé qui vous a esté envoyé pour l’induire à se recognoistre, ce qui n’a point esté entendu par l’ambassadeur, encores qu’on mandast la fin pour quoy on le faisoit. S’il fust venu à ce point, pensez monseigneur que n’eussions failly de servir au temps. Brief, nous sommes accommodés de toutes conditions de personnes, aux bons leur promectre la justice pour n’estre alienez par le retour des grands, et aux aultres, aultre moyen pour les diviser. Je sçay bien qu’il y en a bon nombre de rebelles, mais celluy des bons est aussy bien grand, et vous asseure qu’il y a beaucoup de gens de bien. Il y a des eveschez qui ne sont point gastez et entre autres celui de Rosse, pour lequel vous escript la Royne. C’est ung tres homme de bien. Depuis le bruict de la venue des Anglois, cella a suscité beaucoup d’ennemis et d’envyes aux rebelles, et la Royne n’a point trouvé mauvais que aulcuns ayent temporisé, qui ne pouvoyent resister pour estre aupres de la force des aultres, et lettres particulieres ny proclamations publiques ne defaillent chascun jour. Vous ne jugerez qu’il y eust difference pour le faict de la Relligion aux villes de France à la façon de Edimbourg, tant à la predication que au service de l’esglise, et qu’on fait toujours speciallement continuer parmy les bandes françoises. Et mons^r de Martigues y aura réputation en maintenant l’ordre qu’il a commencé, encores que la justice soit tres necessaire pour cest effet. L’on a tousiours retardé toutes choses, attendant le temps plus opportun et mesmes la publication de la citation du duc. Monseigneur, je ne vous eusse dit ce propos attendant la venue de Mons^r de La Brosse vers vous, qui vous en sçaura dire toutes choses plus particulierement et mieulx qu’il ne se peult escrire, n’eust esté qu’il m’a semblé par la lettre qu’avez escript à la Royne, madame vostre sœur, et principallement par celle qui nous a esté escripte du costé d’Angleterre, que l’on n’eust point recherché le moyen assez ample de reconciliation desd. rebelles. Nous n’avons rien eu tant devant les yeulx que d’eviter toutes les suspitions et moyens qui tendoyent à l’ouverture de la guerre, ou si l’on est constraint d’entrer, nous esperons que si l’on est assailly, il y a moyen de se defendre ; ce qui est plus nécessaire, c’est l’argent, pour ne toucher au magasin des vivres. Mons^r de La Brosse vous rendra trop bon compte de la fortiffication, et semble à ceulx qui en peuvent bien juger que avec l’ayde de Dieu vous en debvez demeurer en repos, comme nous avons faict entendre par l’advis qu’avons envoyé par led. de Montignac. La grande despence qu’ilz porteront en Angleterre les ennuyera et la pauvreté qu’ilz en ressentiront pardeça les humiliera. Aussy la noblesse n’avoit iamais esté si riche, le pays ne peult porter longuement une grande armée, et principallement en ceste saison. Mons^r de La Brosse vous avoit faict requeste pour son neveu pour ung office de conseiller. II a depuis entendu que son expedition n’estoit encores faicte, et vous supplye en avoir souvenance. Quant à la santé de la Royne madame vostre soeur, elle me semble meilleure qu’elle n’a esté. Le cueur et la force lui croissent avec les affaires. Monsr etc. [De] Edimbourg, le xxvije de mars 1560.Footnote ¹⁹

Nous avons occasion pardeça pour entrer en conditions qui soyent desraisonnables avecques la Royne d’Angleterre.

Vre treshumble et tresobeissant serviteur,

[N. E. d’AMYENS]

13. The duc de Guise and cardinal de Lorraine to the sieur d’Oysel, Nicolas de Pellevé, and Jaques de La Brosse, Amboise, 31 March 1560

Copy: AE, MD Angleterre 15, fo. 80r–v

Summary: Cuisiat, no. 648

Messieurs, nous avons receu voz lettres par ce porteur, et louons dieu aux affaires qui se presentment à vous, que tout soit si bien pardelà. Nous esperons puis qu’il les a jusques icy si bien guidez qu’il achevera en mieulx, où de nostre costé ne sera riens oublié, comme vous entendrez par la lettre que escripvons à la Royne, madame nostre seur, sur laquelle nous vous remectons, priant dieu, Mess^rs, vous donner ce que desirez. D’Amboise le dernier jour de mars 1559.

Voz meilleurs freres et amys,

C. cardinal de LORRAINE, FRANCOYS DE LORRAINE.

14. Francis II and Mary queen of Scots: Commission to Jean de Monluc, Nicolas de Pellevé, and Jacques de La Brosse, 1 April 1559/1560

Copies: BL Cotton, Calig. B IV, fos 227r–v; TNA, SP 52/3, fo. 1

François et Marie par la grace de Dieu Roy et Royne de France et d’Escosse, à tous ceux, qui ces présentes verront salut. Comme aucuns de nos subjetz de nostred. royaulme d’Escosse mal conseillez se soyent cy devant desvoyez de l’obeissance qu’ilz nous doivent ; sur quoy nous leur avons fait faire plusieurs gracieuses et douces remonstrances, desirant employer tous les moyens à nous possibles pour les remettre au bon chemin, mais [par] la persuasion d’aucuns, qui plus desirent la ruine dud. royaume que le bien et repos de nosd. subiectz, toutes choses y sont demeurees jusques icy au mesme troubles qu’elles ont esté cy devant : à quoy, encore que nous y puissons pourvoir et donner ordre avec les forces qu’il a pleu à Dieu mettre en nostre main, toutesfois voulant, selon nostre accoustumee clemence, essayera ramener nosd. subietz à la raison par la douce voye et user de grace envers ceux qui sont desvoyez, nous avons avisé les faire encore admonester de leur devoir, et pour cest effect choisir quelques bons personnages à nous seurs et feables. Sçavoir faisons que nous en plain confians des personnes de nos amez et feaux messieurs [Jean de] Monluc, evesque de Valence, conseiller en nostre conseil privé ; et [Nicolas]Footnote ²⁰ de Pelvé, evesque d’Amiens, maistre des requestes ordinaires de nostre hostel ; et de La Brosse, seigneur dud. lieu, chevalier de nostre ordre, et de leurs sens, vertuz, fidelité, loyauté, experience et bonne diligence, iceux, pour les causes, et les deux d’eux en l’absence ou empeschement de l’autre, avons commis ordonnez et députez, commettons, ordonnons et deputons et leur avons donné et donnons plein pouvoir, puissance, autorité, commission et mandement special par ces presentes d’asseurer nosditz subietz dud. royaume d’Escosse qu’encores qu’ilz ayent cy devant commis une si / grande faute que d’oublier leur debvoir, neantmoins venans à se recognoistre et retournerà la deue obeissance qu’ilz nous doibvent, nous les recevrons en nostre bonne grece, et oublierons tout le passé sans qu’il en soyent recherchez à l’advenir, ne desirans rien tant que de les voir vivre soubz nostre obeissance en repos, union et tranquillité. Pour laquelle mieux establir, s’il estoit besoin traitter aucunes choses avec nostre tres chere et tres amee bonne sœur et cousine la Royne d’Angletterre, s’assembleront nosd. deputez avec ceux de nostred. bonne sœur, ayans pouvoir suffisant quant à ce, en tout lieu propre et commode qu’ilz aviseront et dont ilz pourront accorder, pour negocier, traitter et accorder, sur ce qui sera à eulx par d’autres proposé, tout ce qu’ilz verront et cognoistront estre raisonnable, convenable et à propos pour nostre service et bien de nos affaires, selon la fiance que nous avons en eux, encores qu’il y eust chose qui requist mandement plus spécial qu’il n’est porté par ces presentes. Promettans, en bonne foy et parolle de Roy, avoir pour aggreable, ferme et stable tout ce que par lesd. evesques de Valence et d’Amiens, et seigneur de La Brosse, et les deux en l’absence ou empeschement de l’autre, aura esté fait en cest endroit ; et le tout ratifier par nos lettres, si besoin est, toutesfois et qualités que requis en serons, sans jamais aller ne venir au contraire en quelque sorte que ce soit ; car tel est nostre plaisir. Et en tesmoin de ce, nous avons signé ces presentes de nos mains, et à icelles fait mettre et apposer nostre scel. Donné à Amboise le premier jour d’avril, l’an de grace mil cinq cens cinquante neuf, et [de] nos regnes, assavoir de France le premier et d’Escosse le deuxiesme [sic].

[Ainsi signé :] François Marie.

[Et sur le reply :] Par le Roy. De Laubespine.

[Et seellé de cyre jaune à double queue]

15. The duc de Guise and cardinal de Lorraine to Marie de Lorraine, [Amboise, 31 March]; Marmoutier, 9 April 1560

Original: TNA, SP 70/13, fos 48–49 (headed ‘duplicata’ and dated 9 April)Footnote ²¹

Copies: AE, MD Angleterre 15, fos 78r–80r, dated 31 March; intercept, BL, Cotton, Calig. B IX, fos 97–98, dated 9 April. Also deciphered copies in TNA, SP 70/13, fos 50, 54, 58 (decipher attempt), fos 59–60 (draft of cipher text), fo. 48 (English translation).

Summary: Cuisiat, nos 649–650

Madame, nous avons receu vostre lettre par ce marinier present porteur et sceu par icelle en quoy sont les affaires de delà tresmarriz que avecques plus de commoditez et moien vous n’avez esté et n’estes secourue autre que nous jugeons et voyons bien qu’il seroit necessaire, ce qui n’a esté retardé faute de debvoir, de soing et de dilligence. Car nous en avons cherché tous moiens possibles, et mesme pour essayer si ceste royne d’Angleterre se pourroit adoulcir et contenir par quelques remedes qui n’ont trouvé aucun lieu en son endroict. Car apres avoir faict du costé du Roy tout / ce qu’il a esté possible de penser pour luy oster la jalousie et le soupçon qu’elle monstre avoir de nos forces, nous y avons employé le Roy Phillipes tant que son ambassadeur luy en a faict entendre qu’il ne souffrerait pas qu’elle donnast faveur aux rebelles ne entreprendre aucune chose au preiudice des droictz et auctorité du Roy et de la Royne vostre fille en Escosse. Depuis y a esté envoyé l’evesque de Valence conseiller au conseil privé du Roy pour luy rendre plus particulliere raison de l’intention du Roy et qu’il ne cherchoit que l’obeissance de ses subiectz, resolu de retirer ses forces apres que les choses seroient restablies au bon chemin. Tout cela n’a de rien servy si elle n’a ce que vous avez peu veoir par les articlles qu’elle a faict bailler par son ambassadeur si honteux que nous croions qu’elle s’asseuroit bien que nous n’en ferions rien, et par ainsi qu’elle passeroit oultre à sa deliberation qui estoit de faire la guerre, dont nous voyons peu de moien de la retenir, si ce n’est pour dernier l’allée du sr de Glayon, que led. s^r Roy Phillipes y envoye pour luy en parler des grosses dentz. Ayant deliberé si elle se monstre obstiné, de secourir le Roy de tout ce qu’il vouldra pour remectre l’obeissance dud. pais, dont il a esté pris au mot, et ja a esté envoyé en Flandres pour sçavoir de la duchesse de Parme de quel nombre s’en pourra servir, / ayant lad. dame charge expresse d’en accommoder le roy de tout ce qu’il vouldra. Ce pendant, Madame, nous ne perdons poinct de temps à faire advancer l’armée du Roy qui sera d’un si bon nombre de vaisseaulx et si bien fourniz de gens et de toutes choses convenables que nous esperons que lad. Royne ne ses forces n’auront pas moien de vous garder de les secourir. Tout le pis que nous y voyons est qu’elle ne peult estre preste que vers la fin de juillet, mais si ferons nous tout ce qu’il sera possible au monde pour la mectre plustost à la voile, et ne s’y espargne soing, argent ny dilligence, comme nous vous asseurons que vous croyez bien, Madame. Et neantmoins cherchons nous tous autres moiens de vous faire secourir de deniers, soit de Flandres ou d’ailleurs, et aussi ne craindrons nous à en advanturer par petites sommes ce pendant et pour y commancer avons nous advisé vous envoyer ce porteur dedans ung autre petit vaisseau que luy aurons faict equipper, ne luy aiant pas espargné aussi argent. Car il a eu pour estre venu icy et le hazard qu’il a prins douze cens franz que le Roy luy a donnez et troys cens escuz pour son retour. Avecques luy nous vous envoyons par ung clerc qui l’accompaigne la somme de six mil livres et vingt cacques de pouldre grenée, parce que nous avons sceu par les lettres des seigneurs de La Brosse et d’Oysel que vous en avez besoing pardelà. Ce sera pour attendre tousiours mieulx / estans bien deliberez de ne perdre une seule occasion de vous secourir ainsi par le menu au danger d’en perdre quelque chose. Cependant, Madame, il fauldra que de vostre costé vous faciez le mieulx que vous pourrez, et sur tout qu’il soit donné ordre à tenir les places fortes bien garnyes, louant sa Maiesté bien fort la deffencive sur laquelle les cappitaines de deça sont d’advis que vous vous mectiez, qui est ung moien pour avoir la raison de la legereté et malconsiderée entreprise de lad. royne, dont nous esperons que le mal tumbera à la fin sur elle. Ce a esté grande consolation au Roy et à toute ceste compaignie d’avoir entendu par lesd. lettres que tous les soldatz de delà ayent si bonne volonté. Cela nous faict esperer en dieu que tout ira mieulx qu’elle ne vouldroit, car si led. s^r Roy Phillipes chemine en cecy de bon pied (dont il nous asseure) il est impossible que la chose ne tourne à sa confusion.

Quant aux nouvelles de deça nous voullons bien que vous sachez que depuis quinze ou vingt jours aucuns malheureux ont essayé de mectre à fin une conjuration qu’ilz avoient faicte pour tuer et Roy et ne nous oublyoient pas, tout cela fondé sur la religion dont aucuns des principaulx ont esté prins et pugniz.Footnote ²² Maiz tant plus nous allons avant et plus trouvons nous [que ceste conspiration] a la longue queue, ayant esté bastie de longue main et appuyée par aucuns grands qui se sont trouvez bien trompez. Car nostre seigneur a bien sceu deffendre sa cause. [C’est quasi] le mesmes train que ont prins voz rebelles, mais ilz voulloient commancer par le sang et l’espee. Une autre fois vous en sçaurez plus par le menu et pour fin de ceste lettre vous dirons, madame, que la compaignie faict dieu mercy tresbonne chere et nous recommandons treshumblement à vostre bonne grace, priant dieu, madame, vous donner en santé tresbonne et treslongue vye. De Marmoutier le ix^me jour d’avril 1559.Footnote ²³

Voz treshumbles et tresobeissans freres,

C. Car^al de LORRAINE, FRANCOYS DE LORRAINE.

16. ‘Memoire pour envoyer à la Royne Regente d’Escosse du xj d’apvril’ [1560]

Copy (of intercept): BL, Cotton, Calig. B IX, fos 100v–101r; Calig. B X, fos 96–97 (English translation), noted as carried by Chaperon and in cipher

Si l’evesque de Valence va seurement iusques à la Royne Regente d’Escosse, lad. dame entendra par luy comme toutes choses sont passees avecques la Royne d’Angleterre, la dureté qu’il a trouvé en elle et les iniques conditions qu’elle demande tant pour son regard que pour les rebelles escossois. Et de cella sçaura bien juger ladicte dame Royne Regente ce que se peult esperer du cousté d’Angleterre. Elle sçaura aussi dud. evesque de Valence à quelle raison le Roy s’est voullu mettre pour estaindre le feu que lad. Royne d’Angleterre nourrist et les moyens qu’il a choisiz pour l’adoulcir et oster toute occasion de la jalousye qu’elle monstre avoir des forces que sa majesté faisoit passer en Escosse et que n’a de riens profité et peu s’en espere si l’allee par devers elle du sr de Glaion depesché par le Roy Catholique ne faict quelque chose.

Au moyen de quoy il y a peu d’esperance de conduire lad. dame à nulle raison. Il semble aud. S^r que le mieulx que l’on pourroit faire seroit d’essayer d’adoulcir les choses du cousté d’Escosse s’il est possible le essayant de gaigner quelques ungs des seigneurs rebelles avecques promesse d’impunité et asseurance d’obtenir grace et oublier le passé, moyennnant qu’ilz veullent retourner au bon chemin et en l’obeyssance que le Roy desyre tant seullement, le tout suyvant le contenu au memoyre et instruction qui en fut baillé aud. evesque de Valence, lequel sçait en cella l’intention du Roy. Si lad. Royne persiste en son opinion il est bien mal aisé que la rupture ne se descouvre incontinent. Le Roy desire qui ne pourra mieulx faire que l’on se mecte là sus la deffensive pourvoyant les places le mieulx qu’il sera possible attendant le secours qu’il y doibt envoyer, qui sera si bon et si fort qu’il espere avoir la raison desd. rebelles et garder que la Royne d’Angleterre ne les puisse empescher d’estre chastiez ; et pour tout le mois de juing et au plus tard à la my juillet sera led. secours pardellà. En ce secours y aura nombre de vaisseaulx du Roy Catholique et une bonne trouppe de ses subiectz lesquelz il a offert aud. sr pour chastier lesd. rebelles, ayant asseuré le Roy que pour cest effect il l’assistera de tout ce qui est sa puissance.

La dicte Royne Regente est sur le lieu accompaignee de beaucoup de gens / de bien et de bon conseil. Sy elle pouvoit tant faire de trouver moyen de suspendre les choses et garder que l’on ne vint point aux armes, le Roy l’auroit grandement agreable comme il desire singulierement pour la crainte qu’il a que la tardité de son secours en soit dommaigeable. Et neantmoins plus tost que d’y faire une chose honteuse, est bien deliberé d’en attendre ce qu’il plaira à Dieu en ordonner [. . .]Footnote ²⁴ dant pour donner moyen à lad. dame de satisfaire aux despen [. . .] qu’elle a à supoprter à l’ent[tretenem]ent des gens de guerre [. . .] depuis huict jours [a faict] partir le petit marinier [qu’elle] avoit depesché pardeça la somme de six mille livres avecques vingt caques de pouldre. Et presentement il luy envoye par le Cappitaine Chapperon une autre somme de quatre mil escuz, ayant advisé la faire ainsy secourir par petites sommes par divers endroitz attendant que avecques seureté il luy puisse envoyer ung bon et gros renfort, comme il a deliberé faire avecques les forces qui passeront de delà. Et se peult asseurer lad. dame qu’il ne laissera passer une seule occasion de costé de deça de laquelle on puisse tirer utilité pour fortiffier lad. dame ou bien essayer d’amender les choses en une sorte ou aultre pour le bien des affaires de delà.

D’aultant que ladicte Royne d’Angleterre [. . .] faict instance aud. evesque de Valence que de ce qu’il n’avoit poinct de pouvoir pour promectre aulcune choses ausd. rebelles, et traicter avecques elle sur ce que luy semble n’estre bien entendu ny esclaircye entre le Roy et elle, en est presentement envoyé ung en general, duquel lad. dame pourra user envers les ungz et les aultres selon qu’elle verra estre necessaire pour el bien des affaires dud. Royaulme d’Escosse. Sur quoy ne se peult d’icy envoyer plus particulierement instruction, remectant le tout à ladicte dame Royen regente et a bon conseil qu’elle a aupres d’elle.

17. Marie de Lorraine to Jean de Monluc, Edinburgh castle, 14 April 1560

Copy: AE, MD Angleterre 15, fo. 82r–v

Mons^r de Valence, aiant entendu vostre venue à BarrvikFootnote ²⁵ comme nous estions sur le poinct d’entrer en communication pour essayer de pacifier ces troubles le tout est demouré accroché à vostre arrivée pardeça, et cependant les choses continuent. J’ay faict demander à mons^r de Gray asseurance pour vostre passage jusques icy, lequel a faict responce que quand il verroit le passeport de la Royne sa maistresse et du duc de Norfolk son lieutenant (qu’il estoit à penser que vous avez estant venu si avant) il bailleroit le sien. Et quant à luy ne vous seroit faict empeschement, ne voullant toutesfois vous asseurer des Escossois de la Congregation et jusques à dire que si vous estes avecques luy il vous feroit bonne chere, mais vous ne iries plusavant si lesd. Escossoys n’estoient contans. De quoy s’en allant ce herault pardela pour reconduire sire Georges HavertFootnote ²⁶ auquel j’avoys baillé saufconduict je n’ay voullu faillir vous tenir adverty, desirant grandement avoir de voz nouvelles et vous asseuré que s’ilz vouloient vous pourries passer seurement. Surce je prie dieu, Mons^r de Valence, vous avoir en sa saincte et digne garde. De chasteau d’Edimbourg ce xiiij^me d’avril 1560.

[ainsi signé au bas] La toute vostre,

MARIE.

18. Marie de Lorraine to Francis II, Edinburgh castle, 26 April 1560

Copy: AE, MD Angleterre 15, fos 86r–88v

Monsieur, craignant que l’evesque de Valence (qui part aujourd’huy) soit retenu à Londres, j’ay adventuré ceste depesche, estant le petit Lict assiegé depuis troys sepmaines et ont les ennemys faict quelque batterie d’un costé qui n’a en rien qui soit endommaigé ceulx de dedans, qui a esté cause qu’ilz ont faict ung petit fort pour asseurer la tranchée et artillerye, avecques deux mil hommes qui y ont laissé, et vont à ceste heure icy essayer de l’autre costé où ilz sont aussi bien receuz (avecques l’aide de dieu) qu’ilz ont cy devant esté de nos gens qui font sortir toutes le fois [sic] qu’il en est besoing, et donnent tel essay de leur vertu et de l’envye qu’ilz ont de vous faire service, que les Angloys congnoissent bien qu’ilz n’en ont poinct trouvé de plus brasves. Led. evesque a esté à parlementer cinq fois avecques eulx et ceulx de la Congregation, et à la seconde fois fut traicté fort rigoureusement parce qu’il ne vouloit accorder la desmolition du petit Lict, et fut mis soubz seure garde. Depuis ilz se adviserent et remyrent sus la negociation, luy donnant telle liberté qu’il a voulu pour aller et venir devers moy, et afin de ne laisser perdre aucun moyen possible et raisonnable pour pacifier les choses selon vostre intention, et que les Escossoys qui ne sont ancores declarez contre nous (qui sont pour le moins les deux partz) n’entrassent en quelque jalousie si la rupture de la negociation venoit de nostre costé, je fus d’advis de la faire continuer. Et voiant qu’ilz s’arrestoient sur la desmolition du petit Lict, je feis aussi de nostre costé les demandes necessaires pour la / seureté de voz droictz et de l’entiere obeissance qu’ilz vous doibvent, c’est à sçavoirFootnote ²⁷ : que l’armée d’Angleterre qui est presentement en ce royaume se retirast hors des fins d’icelluy ; que la ligue faicte avecques la Royne d’Angleterre fust revocquée, cassée et abolye, les hostaiges ramenez pardeça, qu’ilz vous en bailleroient des principaulx d’entre eulx en tel nombre et pour tel temps que vous ordonnerez ; que les troys Estats du pays seroient assemblez, s’obligeroient de poursuivre à leurs despens celluy qui par cy apres feront quelque rebellion ou assemblée de gens de guerre pour quelque occasion que ce fust ; que le duc de Chastellerault remectroit pour tel temps qu’il vous plairoit le chasteau de DombertrandFootnote ²⁸ entre le mains de tel Escossoys qui seroit choisy par vous ou vos ministres ; qu’ilz me recognoistroient pour Regente, et ceulx qui viendroient par cy apres de vostre part. Sur ces articles ilz furent en grande dispute, par ce que avant toutes choses ilz vouloient que ce qui a esté faict de nouveau à Dombarre fust desmoly. Mais led. evesque leur couppa ces propos, disant que je ne l’accorderoys jamais, par ce que lad. place vous a esté baillé par les Estatz et vous est promys de la meliorer et d’y faire ce qu’il sera necessaire pour vous en asseurer. De ce poinct ilz vindrent en ung autre et demanderent, si en nous accordant tous les articles cy dessus mentionnés je prometteroys aussi la demolition du Lict. Led. evesque / insistoit à debatre article pour article, et que de son costé il avoit offert parties honnestes et raisonnables, comme estoit l’abolition des faultes passées, la conservation des privilleges et le renvoy d’une grand partie de soldatz qui sont pardeça. Et toutes fois de leur part ilz n’avoient ancores presenté chose qui approchast de l’entiere obeissance sinon en termes generaulx. Afin de mieulx cognoistre à tous que la faulte ne venoit de nostre costé, respondist led. evesque que pourveu qu’on permist que je commencasse le tout avecques ceux qui sont au petit Lict pour en avoir leur advis, l’on ne s’arresteroit poinct sur la difficulté de lad. desmolition. Et apres laquelle responce, monstrans visaige de voulloir consentir tout ce que nous voulions desirer, s’arresterent sur le second article, qui estoit de la revocation de la ligue, remonstrans que nous demandyons chose impossible par ce que la Royne d’Angleterre estoit loing d’icy et que ses ministres n’avoient aucune autorité de parler de cela, et que de leur part ne pourroient faire autres chose que de prier lad. royne de rendre lesd. hostaiges et de les tenir quictes de leur promesse, laquelle promesse toutesfois n’estoit de telle qualité qu’il y eust ung seul mot contre la fidelité et obeissance qu’ilz vous doibvent. Mais il est autrement car il y a ligue offensive et defensive, et que pour l’honneur de dieu l’on ne se voulust poinct arrester à si peu de chose ; que le principal estoit de faire ceste paix, et que puis apres l’on pourroit obtenir plus que cela. A quoy led. s^r de Valence respondit que leurs raisons estoient / fort bonnes leurs remonstrances bien pertinentes, mais que si de vostre costé il y avoit de la difficulté, il y auroit aussi de la bestise brutale en luy, et en tout autre qui trouverroit bon que le List fust desmoly, voz forces renvoyées, et que voz subiectz rebeles demourassent en ligue avec ung prince estranger, et qu’il n’avoit jamais entendu que les subiectz en quelque pais que ce soit peulsent demourer en ligue avecques ung autre prince sans congé de leur prince naturel ; que si cela estoit advenue en Angleterre il y auroit beaucoup de testes qui en porteroient la penitence (comme la raison le voudroict bien), et autant en adviendoit à tous les subiectz des autres princes chrestiens ; et que c’est assez que vous ne vouliez poinct qu’on parlast du passé, pourveu qu’on trouvast moien de vous asseurer pour l’advenir. Ilz respondirent à cela que ce Royaume a les loix differens de tous les autres, et que leur Roy et leur Royne n’ont autorité (ce qui n’est veritable) de faire ligue ny entretenir paix ou commencer guerre sans le consentement des Estatz. A quoy led. evesque replicqua que quant ainsi seroit à plus forte raison est il defendu aux subiectz et leur est encores moins permys de continuer au contract faict sans l’auctorité du prince et des Estatz. Leur excuse fut tousiours l’impossibilité, offrans de remectre cecy ausd. Estatz prochains et d’en faire ce qu’il seroit ordonné, s’il estoit jugé lad. ligue prejudiciast au bien du paix. / Led. evesque leur demanda si ce pendant il estoit raisonnable que vous fussiez despouillé de terre et de force d’hommes et la Royne d’Angleterre par obligation fust maistresse de leurs corps et de leurs cueurs, adioustant en cela que vous ne mettriez jamais en dispute le principal droict de vostre couronne qui est la fidelité et subiection de voz subiectz, sans qu’ilz peulsent donner ne lier avecques autres pour quelque occasion que ce soit. Et pour le dire en ung mot, ilz sont entrez plus avant qu’ilz ne vouldroient et ne peuvent reculler d’une seulle parolle, qui est cause que beaucoup de gens de bien de ceste nation eussent bien desiré que par le moyen des conditions cy dessus escriptes l’on eust rompu ce coup et dissipé ceste armée par ce que, si mesavenoit du Petit Lict, il est certain que les Angloys le retiendroient pour eulx, et aussi feront ilz bien ce chasteau et aussi forteresses si vostre secours ne se haste de venir. Ce que nous avons proufficté à negocier avecques eulx est que ceulx qui ne se sont declarez entendront que la faulte ne vient de nostre endroict, et que ceulx de la Congregation sont tellement lyez qu’ilz n’ont le moien de s’en separer, et mettent ce royaume en danger de tumber es mains de leurs anciens et cappitaux ennemys. Vos ministres qui sont au petit Lict m’ont asseuré par lettre qu’ilz esperent de n’estre poinct forcez et d’avoir du pain jusques à la my juing, vous suppliant treshumblement, Monsieur, faire advancer vostred. secours tant qu’il sera possible. L’isle aux chevaulxFootnote ²⁹ est bien / pres de la fin de ses vivres s’ilz ne les ont mesnagez. Ce pendant je fais tousiours ce que je puis pour l’avitailler et n’y sera rien espargné. Led. evesque ne vous escript poinct de peur que baillant plusieurs lettres au porteur cela fust cause de faire perdre le tout. Du chasteau d’Edimbourg le xxvj^me jour d’avril 1560.

19. Marie de Lorraine to the sieur d’Oysel, Edinburgh castle, 27 April 1560Footnote ³⁰

Copy: AE, MD Angleterre 15, fos 91r–92r

Monsieur d’Oysel, j’ay veu ce que m’escripvez de vostre advis que je trouve fort prudent. Quant à l’intention du Roy ce n’est poinct pour dissimuller mais à bon essient. Quant au nombre de gens de guerre y n’y est speciffié et dieu scet sy on mect largement sus moy ne nommant personne en l’instruction que moy. Je n’ay lettre du monde particulliere qu’un mot de credit du Roy et de mes freres, Mons^r le cardinal estoit en grande frayeur à son partement car on ne parle que de le thuer. Le Royne mere et les dames que sçavez la gouverner ne veulent poinct que l’on face mourir des gens de ceste nouvelle faction et en ont esté en mauvais mesnaige. Je vous prie garder cecy à vous. Il y a beaucoup d’autres particullaritez qui seroient trop longues à escripre. Si mons^r d’Amyens eust esté pardelà, je croy fut passé avec le president Mynard. Mons^r de Valence dit que nos gens se rencontrerent hier sus le poinct que vous escripvoys et le receurent beaucoup plus doulcement que de coustume et accordent toute la seuretté que j’ay demandée, pourveu que le Petit Lict et les Francoys au surplus que ce qui garde la place acoustumée / s’en allassent. Voyant mons^r de Valence que c’estoit pour mectre la roupture de nostre costé leur accorda se pouvoir faire avec vos advis. Mais à la fin, tout demeura sus la ligue d’Angleterre qu’ilz ne peulvent rompre sans la Royne d’Angleterre, qui est le meilleur poinct sur quoy ilz nous peulvent reffuzer pour nous et que le pays aura plus à cueur. Je ne fauldray à le publier et en faire mon prouffict. Je vous asseure qu’ilz ne sont d’ung mesme etosve d’apparance en leur camp et non tous contens et sont plus fort liez qu’ilz ne voudroient. Le conte de HontelayFootnote ³¹ est venu avec iiii^xx chevaulx. Je ne l’ay ancores veu. Il m’a mandé de belles choses. Mais je croy n’a credyt de nul couté. Le conte d’AtalFootnote ³² l’a gardé que personne n’est venu avecques luy. Il avoit escript à ceulx des frontieres pour le trouver, mais parsonne ne vient à luy. On dit que les ennemis vous veulent avoir par mynes ou par famines, et la bapterie qu’ilz feront sera entre St Anthoine et le boullevard du boist. Il y en a ung grand nombre de blessez et de mortz. Vous tyrates hier deux bons coups en leur camp nouveau. Au reste j’ay eu lettres de Dombarre que le Cappitaine Perot et dix soldatz sont pris et le cappitaine Ayen aussy avecques autant.Footnote ³³ J’entendz que le cappitaine Perot estoit sorty pour aller apres de ses soldatz qui pilloient et alla dehors sans congé. Et parce qui s’en alloit envoyer des gens à Barvik les enfermyt et le print. Quant [à] Aye[n], il ouyt le bruict [et] y sorty avecques douze chevaulx pour veoir que c’estoit il fut pris de mesmes. Il se cuyde saulver à Andreouyque et le gentilhomme feit tout ce qu’il peut pour ceste effect, de sorte qu’ilz ont pillé toute sa maison et l’ont pris prisonnier. Voila comme SarlabosFootnote ³⁴ me l’escript qui crye tousiours apres de l’argent disant debvoir six cens francs / aux ouvriers des deux sepmaines passées. Je ne sçay pas où le plandre quant à vos deniers, car comme je vous mande par une lettres il y a mil francs du passé. J’avoys tousiours oublié vous dire que Baquenes a esté malheureusement rendu sans necessité.Footnote ³⁵ Je ne vis jamais que des meschantz là dedans ; ilz estoient trop aysez. Quant à vos lettres particullieres qu’a apporté mons^r de Valence, je les vous envoye. Je les ay toutes ouvertes pour veoir s’il y avoit rien de dangereux trouvant que non. Je les ay hazardées avec ce porteur. Il n’y en a poinct pour mons^r de La Brosse. J’ay tout envoyé.

[Et à travers de lad. minutte en la marge est escript :] Monsieur le Cardinal dit n’avoir poinct veu de depesche resolue. Je luy ay dit qui avoit esté cause, et que l’on ne vouloit croire ce qui est advenue des Angloys. Je n’ay oublié à ramentevoir vostre part et de faire ce que vostre frere vous escript de bouche, car il ne prend lettre.

20. Marie de Lorraine to the sieur d’Oysel, and Jaques de La Brosse, 29 April 1560

Copy: AE, MD Angleterre 15, fo. 92r–v

Intercept in cipher: TNA, SP 52/3, fo. 138, with English translation

Je receuz hier une lettre de messieurs mes freres dont je vous envoye le double, où je ne trouve ny saulce ny verjus. Je croy qu’ilz estoient si empeschez de delà qu’ilz ne sçavoient où ilz estoient pour lors. Lad. lettre est escripte trois jours apres le partement de monsieur de Valence. Il s’en alla hier, et se rompit nostre negociation sur l’article de la ligue d’Angleterre parce qu’ilz ne pourroient retirer leurs hostaiges, et la vouloient remectre aux Estatz. Ilz y sont entrés si avant qu’ilz ne s’en peuvent retirer, de quoy je sçauray bien faire mon prouffict et ne failleray à le publier. Je vous escriviz hier bien au long par ung gentilhomme de mons^r de Seton, auquel / je pensois bailler voz lettres, lesquelles ne sont que de voz affaires seulement. Il n’y en a poinct pour mons^r de La Brosse. Je vous prie me mander s’il est entré à petit Lict ou non avecques mes lettres, parce que’il debvoit aujourd’huy revenir querir vosd. lettres et n’a esté veu depuis. Au demeurant je suis advertye de tous endroictz et me l’a aussi dict mons^r de Valence, que nos gens ne demande que la moindre occasion du monde pour s’attacher à ceste place. Je l’envitaille le plus que je puis, et fais travailler des pionniers aux endroictz le plus necessaires. J’ay faict faire un flanc du costé de la porte de l’esperon, dont ilz ont voulu prandre matiere de quereller. Quant à ma santé elle est meilleure que de coustume. Je suis tousiours boyteuse, et ay ung pied qui ne desenfle poinct. Si on mect le doigt dessus il entre comme en du beurre. Vous sçavez qu’il n’y a que pour trois jours de l’ydropsie en ce pais. Du xxix^me avril 1560.

21. Marie de Lorraine to the duc de Guise and cardinal de Lorraine, 30 April 1560

Copy: AE, MD Angleterre 15, fos 92v–94v

Messieurs mes freres, je receuz il y a deux jours la lettre que m’avez escripte par ce porteur que je vous ay renvoyé en dilligence / aiant esté bien aisé que le Roy et vous ne vous soiez tant arrestez sur les parolles et dissimulations de la Royne d’Angleterre que ce pendant il n’ayt esté donné ordre d’equipper des vaiseaulx avecques les forces que le Roy tient prestes pour passer par deça où lad. royne faict tous ses effortz par mer et par terre. Je vous ay amplement escript par les depesches que je vous ay faites des premier et xix^me de ce moysFootnote ³⁶ par mon aulmonier de la venue de l’armee de terre des Angloys, de l’assiegement de petit Lict et communication que j’avoys eu avecques eulx devant l’arrivée pardeça de l’evesque de Valence. Et par la lettre que je fais presentement au Roy vous verres la negociation dud. evesque avecques les rebelles dont il n’est rien reussy. Il partit il y a deux jours pour s’en retourner mais je croy qu’il sera retenu à Londres jusques à la fin du siege, et que la Royne d’Angleterre ne luy avoit permis de passer par deça à autre fin que pour cuyder soubz l’apparence de ceste negociation retarder les forces du Roy, et ce pendant tascher à executer ses desseings sur lad. ville de petit Lict, qui est à ceste heure vifvement assiegée ; aians les Angloys faict ung fort d’un costé et mys leur camp des deux autres en sorte qu’elle est environnée et du costé de la mer et de tous les endroictz de la terre, qu’il y a six jours que je n’ay sceu avoir nouvelles de ce qu’il s’y faict. Par les dernieres que j’ay eues ilz n’esparent d’estre forcez, et font compte d’avoir du pain jusques au xv^me de juing à le bien mesnager / comme ilz font. Ilz sont si gens de bien qu’ilz mourront tous plustost qu’il en vienne faulte, en attendant le secours que je vous prie ne soit retardé plus que led. temps. Ce seroit grand dommaige de laisser perdre une si brave trouppe et si ne seroit tout, car le reste se perdroit quant et quant et ne se fauldroit attendre d’y mectre apres le pied. Vous priant, messieurs mes freres, haster led. secours et qu’il soit de forces si gaillardes, qu’il passe sans estre empesché des navires de la Royne d’Angleterre, qui faict toute la dilligence qu’elle peult d’en faire armer par tous les portz de son roiaume, mais si led. secours peult une foys estre pardecà, j’ay esperance avecques l’ayde de dieu, que le Roy en aura bien la raison par terre. Les Angloys attendent troys ou quatre mil hommes qui leur doibvent venir de renfort dans huict jours et sont les Escossoys en fort petit nombre avecques eulx. Ce n’est quasi riens si nostre secours estoit arrivé il y en auroit beaucoup de nostre costé, que voyant l’armée d’Angleterre maistresse de la compaignéeFootnote ³⁷ n’osent bouger. Quant aux seditions dont m’escrivez il me desplaist extremement que vous en estes en peine. J’ay il y a desia long temps dict à ceulx qui sont à petit Lict la craincte que j’en avoys. Si j’estoys demye heure aupres de vous je vous esclarciroys beaucoup de choses. Seulement vous diray je maintenant que vous n’aurez peu affaire de vous / y conduire sagement. Et ferez bien d’en sortir le plus directement que vous pourrez,

Du chasteau d’Edimbourg le dernier jour d’apvril 1560.

Le feu prit hier au soir dernier jour d’avril au petit Lict estant le vent grand et avons veu beaucoup de maisons enflammées. Nous ne pouvons sçavoir ancores quel dommaige il aura faict et s’il a poinct touché à leurs vivres. Ce porteur vous dira fidellement ce qu’il a veu. Il faict bonne dilligence, Je vous prye le bien traitter pardelà.

J’ay cydevant escript à vous mons^r le Cardinal, pour l’expedition de l’abbaye de GlenluceFootnote ³⁸ pour le conte de Cassalles.Footnote ³⁹ Et d’autant que j’ay sceu que le messaiger a esté pris en chemin, j’ay faict adjouster ce mot à la presente, vous priant escripre en court de Rome pour la faire expedier.

22. Francis II and Mary queen of Scots: Commission to Jean de Monluc and others, Chenonceau, 2 May 1560

Copy: TNA, SP 52/3, fo. 160

Summary: CSP Scotland, III, no. 8

Françoys et Marie par la grace de Dieu Roy et Royne de France et d’Escosse, à tous ceulx qui ces presentes lettres verront, salut. Ce que nous avons plus desiré depuis le trespas de feu nostre treshonnoré seigneur et pere le Roy dernier decedé que dieu absoille, a esté d’entretenir la paix amytié et confederation qui avoit esté establye de son vivant avec les princes chrestiens ses voisins, et mesmement avec nostre treschere et tresamee seur et cousine la Royne d’Angleterre par tous les meilleurs offices d’amytié qu’il nous a esté possible ainsi que chacun a peu veoir et congnoistre par la sincerité de noz actions et gratieux deportemens envers chacun desd. princes. Mais d’autant que la rebellion d’aucuns noz subiectz du Royaume d’Escosse a faict que sur les frontieres dud. royaume et de celluy d’Angleterre se sont faictes quelques assemblees de gens de guerre d’une part et d’aultre, de maniere que cela pourroict aucunement alterer nostre commune amytié, pour laquelle establir et pacifier les differentz que pour l’occasion susd. pourroient estre survenuz, aians esté advertiz que nostred. seur se contente depputer sur les lieux quelques bons personnaiges, SCAVOIR faisons que nous, desirans sur toutes choses veoir le Chrestienté en repoz et garder le plus longuement que nous pourrons la paix qu’il a pleu à dieu nous envoyer à son honneur et repoz de ses peuples comme chose que nous avons tousiours eu en singuliere recommandation, pour la parfaicte et entiere confiance que nous avons des personnes de noz amez et feaulx m^res Jehan de Montluc evesque de Valence, et de Nicolas de Pelvé evesque d’Amyens conseiller en nostre conseil privé, Jacques de la Brosse s^r dud. lieu chevalier de nostre ordre et nostre chambellan ordinaire, Henry Cleutin s^r d’Oysel gentilhomme de nostre chambre et nostre lieutenant aud. royaume d’Escosse, et Charles de la Rochefaucault s^r de Randan cappitaine de cinquante hommes d’armes de noz ordonnances, et de leurs sens vertuz, loyaulté, preudhommie, experience et grande diligences, iceulx pour ces causes et autres grandes considerations à ce nous mouvans, et les trois et deux d’eulx en l’absence ou occupation des autres, avons commis, ordonnez, depputez, commettons, ordonnons et depputons par ces presentes pour se transporter sur la frontiere de nostred. royaume d’Escosse et se trouver et assembler avec les depputez de nostred. seur la Royne d’Angleterre au lieu qui sera par leur commun consentement / advisé, et au jour qui sera entre eulx accordé et deliberé, et autres dependances d’icelluy, pour là traicter de la reconciliation de nostred. commune amytié et adviser des differens qui pourroient l’avoir alteree en quelque sorte que ce soit, les composer et accorder ainsi qu’ilz verront estre à faire pour le bien de nostre service, repoz et tranquillité de noz royaumes, pais et subiectz, et generallement faire en ce que dessus, circonstances et deppendances tout ce que nous mesmes ferions et faire pourrions si present en personne y estions jacoit qu’il y eust chose qui requist mandement plus special qu’il n’est contenu en ces presentes, par lesquelles promectons en bonne foy et parolle de Roy et Royne avoir pour agreable et tenir ferme et stable tout ce que par nosd. depputez et les trois ou deux d’eulx en l’absence ou occupation des autres aura esté faict, conclud et arresté, et le tout entretenir, garder et observer approver et ratiffier dedans le temps et ainsi qu’ilz adviseront, sans jamais aller ne venir au contraire en quelque sorte que ce soit. Car tel est nostre plaisir. En tesmoing de ce nous avons signé ces presentes de noz mains et à icelles faict mettre nostre seel. Donné à Chenonceau le deux^e jour de may l’an de grace mil v^c soixante et de nostre regne le premier.

[signé] FRANCOYS et MARIE

[et sur le reply] Par le Roy et la Royne, De Laubespine.

[et seellé à double queue en cire jaune].

23. Francis II to Elizabeth I, Chenonceau, 2 May 1560

Original: TNA, SP 70/14, fo. 4

Treshaulte et tresexcellente princesse, nostre treschere et tresamee seur et cousine, salut. Ayant entendu le desir que vous avez, que les differendz survenuz pardela se passent par la voie amiable comme de nostre part nous avons tousjours cherché, nous avons advisé depescher le s^r de Randan, gentilhomme de nostre chambre present porteur pardevers vous, auquel nous avons donné charge vous dire aucunes chose de nostre part, dont nous vous prions tresaffectueusement le vouloir croire, tout ainsi que vous feriez nous mesmes, priant dieu Treshaulte et tresexcellente princesse, nostre treschere et tresamee seur et cousine vous avoir en sa tressaincte et digne garde. Escript à Chenonceau le deux^e jour de may 1560.

Votre bon frere et cousin,

FRANCOYS,

De Laubespine.

24. Marie de Lorraine to the sieur d’Oysel, 3 May 1560Footnote ⁴⁰

Intercept: BL, Cotton, Calig. B IX, fo. 102

Depuis la venue de l’ennemy à Petit Lyth je n’ay eu aulcunes nouvelles de vous. Je vous ay envoyé plusieurs, et ay sceu que tous ont esté pris en allant si ung gentilhomme qui est à mons^r de Seton n’est entré, par lequel vous ay amplement escript. La negociation s’est rompue sur la venue du d. de Norf. pource que noz gens ne veullent ou peuvent laisser, et s’en alla il y huict jours. La Royne d’Angleterre continue ses dissimulations mais que le Roy ne s’y repose tant qu’il [n’en] ayt adverty le Ro[y d’Espagne] qui luy promect bailler vaisseaux et vivres. Le Roy a p[. . .] a faict armer vingt quatre gros navires pour envoyer pardeça avecques les aultres forces qu’il faict tenir prestes. Voila la somme d’une lettre que mess^rs mes freres ont escript. Le chiffre est fort dangereux, m’ayant depuis deux jours esté monstré une translation faicte en Anglois de mot à mot de la lettre que je receuz de trois endroytz du xix^me febvrier, où il est tant parlé du chasteau et de temporizer avecques les rebelles. Ce qui est escript du m^e Baptiste est à bon escient et vous prye que la remede me soyt envoyé. J’ay envoyé quatre cens escuz au s^r de Sarlaboz à deux fois depuis dix jours. Voyez ung mémoire qui me vient d’estre envoyé, baillé de l’entreprise de l’ennemy. Ce propos estoit hier au soir de faire leur trenchee du costé du north de [. . .] à l’endroict de la citadelle, affin de miner lad.^te citadelle. Ung homme nagueres venu de Londres a promis my lord Gray de separer dedans trois jours et trois nuictz le nouveau boullevert de Sainct Anthoine d’avecques la ville. Pour ce donnez ordre de ce cousté là. My Lord Gray se vante que dedans lundy ou mardy prochain qui sera le six ou septiesme de May il entrera dedans la ville ou il luy coustera beaucoup de ses gens. Et est leur intention de donner l’assault au poinct du jour. Ilz ont demandé que les Lordz, lordz et gentilzhommes escossois preigne chascun ung Anglois par la main de pareille qualité quant ilz vont à l’assault.

25. Marie de Lorraine to the duc de Guise and cardinal de Lorraine, mid-May 1560

Copy: AE, MD Angleterre 15, fos 97r–99r

Messieurs mes freres, incontinent apres ma susd. lettre fermée j’eux advertissement que les ennemys avoient deliberé faire dans huict jours plus grands efforts qu’ilz n’avoient ancores faict, ce qui fut cause de me faire retenir ce porteur jusques à ceste heure, pour veoir que ce seroit et tenir le Roy et vous advertiz de toutes choses. Le troisiesme de ce moys commencerent lesd. ennemys à trois heures du matin leur baterie en la courtine du WastFootnote ⁴¹ qui est fort longue de terre sabloneuse sans gason et le fossé petit entre St Anthoine et la Citadelle. Continuerent avecques dixhuict ou vingt pieces presque tout le jour, mais nos gens usoient de telle / dilligence à vuider le fossé et reparer ce que l’artillerie endommageoit en lad. ouverture, que lesd. ennemys pouvoit cognoistre que lad. baterie ne leur apportoit grand’utillité. La nuict mesmes environ unze heures, nos gens estans sortiz du costé d’une fort que les ennemys ont faict y voyans l’allarme led. ennemys sortirent de leur camp où ilz ne retournerent tous. Et leur fut tué en chemin pour le moins deux cens hommes bien autant blessez sans qu’il y eust perte d’un homme des nostres. Le lendemain et les deux jours ensuivans, lesd. ennemys, monstrans vouloir continuer la baterie tirerent continuellement en ladicte courtine et principallement aux defenses et ce pendant feirent faire grand nombre d’eschelles. Et ayant les rebelles nouvellement soldoyé deux enseignes de gens de pied et faict venir des villes le plus de gens qui leur fut possible, le vij^me de ce mois au poinct du jour ayant toute la nuict battu les flancs du boulevert St Anthoine et le petit boulvert pres de l’eau, asaillirent la ville de petit Lict de tous costez d’une furie grande par terre et par mer. Et dura l’assault plus de deux heures et demye, d’où ilz furent repoulsez et y demeura six ou sept sens hommes dans les fossez sans ceulx qui furent emportez morts. Le nombre des blessez est fort grand.Footnote ⁴² Quant aux nostres, j’ay eu advis / de petit Lict que graces à Dieu il n’y en eust que quinze tuez et quelques blessez tous sans danger. Les ennemys se sont depuis renforcez de quelque peu de harquebouziers qui leur sont venuz de Beruik et ont remply leurs nouvelles bandes, dont il ne restoit apres led. assault que sept ou huict, de l’une le cappitaine et enseigne tuez. Les Angloys y ont perdus trois ou quatre de leurs plus brasves cappitaines. Et pour tout cela nos rebelles ne sont moins haultains que paradvant, ayant lesd. Angloys et eulx deliberé ne bouger de là qu’ilz n’entrent dedans la ville, disans qu’ilz sçavent bien que il ne viendra secours de France devant le mois d’aoust, qu’il n’y a vivres pour si longtemps, et qu’ilz font faire grande quantité de nouvelles eschelles, et veulent aussi essayer de l’avoir par myne. Le feu qui preit l’autre jour à petit Lict, dont je vous escriptz en mon autre lettre, gasta une partie de leur breuvage. Mais ilz font compte d’avoir recours aux puys. Quant au pain comme je vous ay escript ilz en ont jusques au xv^me de juing bien estroictement. Si le secours tarde d’avantaige ce seroit laisser perd[r]e des plus brasves hommes de chestienté, ainsi que leurs ennemys et myennes publient. Je vous prye qu’ilz soient secouruz. /

Voiant l’importance de ceste place, et ces gens icy oppiniastrez devant, j’ay ancores depuis quatre jours essayé tous moiens possibles pour les conduire à quelque appoinctement non voiant qu’ilz donnassent seuretté de leur obeissance, ce qu’ilz disent assez vouloir faire. Mais ilz font cognoistre par effect qu’ilz n’en ont poinct d’envye ou qu’ilz ne peuvent sinon ce qu’il plaist aux Angloys, n’ayant voulu permectre que j’en communicasse avecques ceulx de petit Lict. Mais vouldroient que j’accordasse le renvoy des François et demolition de la place devant toutes choses et sans leur advis. Cecy vient de l’oppinion de Lord Gray qui dict que jamais homme de guerre ne permect aux assiegez d’avoir communication avecques ceulx desquelz ilz attendent le secours. Nous en sommes là demeurez, et semble à la contenance des ennmys (ancores qu’ilz menassent tousiours de vouloir donner autre assault) qu’ilz la veulent avoir par famine. Car ilz disent qui sçavent bien que le secours n’est prest à venir de France, et qu’il n’y a vivres dedans pour attendre si longuement. Ilz ont renvoyé leur cavallerie, et ce pendant veulent esprouver la myne à quoy ilz besongnent à ceste heure. Et ancores que noz gens sont assiegez de pres et de tous costez, si est ce qu’il ne se passe jour qu’ilz ne leur facent quelque bravade en leurs tranchées. Vous sçavez pour combien ilz ont de pain. Je vous prye, / Messieurs mes freres, faire que le secours arrive par deça devant qu’ilz en soient au blanc.

26. Marie de Lorraine to Francis II, Edinburgh castle, 17 May 1560

Copy: AE, MD Angleterre 15, fo. 99r–v

Monsieur, se trouvant la Conte BoithuilFootnote ⁴³ en ceste extremité qu’il ne sçait quasy où se mectre durant le sejour des Angloys par deça, pour estre ses terres et maisons aux endroictz où ilz ont leurs forces, et ne voulant temporiser ny dissimuler avecques eulx ny avecques les rebelles l’intention qu’il a de vous demeurer tousiours entier et fidelle subiect, a deliberé en actendant la venue de vostre secours, faire ce voiage devers vous, ce que luy provenant de la grande affection qu’il a à vostre service en envye de voir advancer l’armée dud. secours, je ne luy ay sceu refuser, et ne veulx faillir, Monsieur, vous tesmoigner les grands services qu’il vous a faictz depuis le commencement de ces troubles jusques à maintenant, où il n’a espargné sa personne, biens ny amys en toutes les occasions qui se sont presentees, vous suppliant treshumblement, Monsieur, le vouloir recognoistre et honorer de chose digne de ses merites. Et au reste d’autant qu’il vous rendra fidelle compte / ce qui se passe pardeça, je ne feray ceste plus longue que pour supplier le Createur, apres m’estre treshumblement recommandée à vostre bonne grace, vous donner, Monsieur, en parfaicte santé, tresbonne et treslongue vie. Du chasteau d’Edimbourg ce xvii^me jour de may 1560.

[et bien bas est soubzscript et signé de la main de la Royne douairiere d’Escosse]

Vostre treshumble et tresbeissante mere,

MARIE DE LORRAINE.

27. Marie de Lorraine to [the sieur d’Oysel], 17 May 1560

Copy: AE, MD Angleterre 15, fos 99v–100r

Intercept: TNA, SP 52/3, fos 235–236 (CSPF, III, no. 104)

J’ay eu advis que outre la myne que les Angloys font à la Citadelle, ilz en font une à St Anthoine plus secrette et cogneue à peu d’Escossoys. Et dict [l’]homme qui a esté dedans (comme il m’a esté rapporté) qu’elle est desia advancée presque de la longeur d’une butte commenceant en leur tranchée ; qu’il y a sept vingtz hommes dedans qui besognent et cinquante pour la garde ; qu’ilz la conduisent droict au flanc ; et que dedans lundi ou mardi ilz seront outre la courtine. Il y a plus de douze jours que je vous envoiay advis par divers endroictz de la deliberation qu’ilz avoient de myner aud. St Anthoine. Le petit boulevert pres le moulin et la Citadelle. Et ancores dernierement par le mouchoit du Cappitaine Sarlaboz que je ne sçay si aurez receuz.Footnote ⁴⁴ Ma jambe graces à dieu se porte bien. Le feu est dehors et moy mesmes en ay esté medecin et / cirurgien. Je vous manday par led. mouchoir que CroftFootnote ⁴⁵ estoit passé à Bervik mais j’ay depuis sceu que c’est Havert. Leur cavallerie s’en est allée, et leur est venu depuis huict jours à deux fois environ set cens hommes dud. Bervik. Ces jours passez le prieur Ruthvven, le m^e Maxwell et LethgenFootnote ⁴⁶ ont esté deux fois icy. J’estoys entrée en communication avecques eulx, pensant par là tirer à tout le moins moyen de communicquer avecques vous. Mais je [ne] l’ay sceu obtenir, car ilz vouldront que devant que parler à vous il fust arresté le renvoye des Francoys, suivant les offres de mons^r de Valence, ce qui a esté cause que n’avons riens faict. Mons^r de Bothuil m’a demandé congé de faire ung voiage en France. J’ay faict ung ample depesche par luy et une autres par Wilson,Footnote ⁴⁷ parent de l’evesque de Domblaine qui est nagueres revenu de France. Du chasteau d’Edimbourg ce xvij^e may 1560.

Il ne fault attendre le secours plustost que le moys de juillet. Si ce pedant vous estes en danger et aviez moyen de m’advertir je ratacheroys la praticque.

Cest apres disnée, il m’a esté dict par homme qui a veu les mynes des ennemys qu’il y a de l’eau en celle de St Anthoine mais du costé de la citadelle ilz trouvent la terre fort dure et ferme. Ilz ont commencé à myner à leur derniere tranchée au plus emynent de lad. citadelle et en ont faict dix ou douze pas. Le commencement est estansonné, le reste non et se tient la terre comme il dict / avoir veu ainsi que si c’estoit une voulte.

28. Marie de Lorraine to the duc de Guise and cardinal de Lorraine, Edinburgh castle, 21 May 1560

Copy: AE, MD Angleterre 15, fo. 101r

Messieurs mes freres, ce mot sera ancores pour vous dire que il ne fault plus envoyer personne par Angleterre, car les saufconduictz que donne la Royne dud. pais, pour le passage de ceulx que vous depeschez pardeça ne sont qu’abbuz et ung appast pour les amener es mains des rebelles, comme il est ancores advenu depuis cinq ou six jours du cappitaine ChapperonFootnote ⁴⁸ que le duc de Chastellerault tient prisonnier. Les ennemys attendent deux ou troys mil hommes d’Angleterre qui leur doibvent venir de brief, et besognent fort à leurs mynes. Ilz ont ces jours passez deliberé en leur conseil de faire ung Parlement au x^me de juillet pour eprouver toutes choses ; et publient qui ne viendra secours devant le moys d’aoust, de quoy beaucoup de gens de bien qui ne sont de leur party entrent de jour en jour en plusgrand peine et disent que ce seroit une perte irreparable. Le tout gist en la dilligence et advancement du secours que je vous prie faire haster ou mander qu’il ne s’y fault poinct attendre. Du chasteau d’Edimbourg le xxj^e may 1560.

29. Marie de Lorraine to the duc de Guise and cardinal de Lorraine, Edinbugh castle, 26 May 1560

Copy: AE, MD Angleterre 15, fos 102v–104r

Messieurs mes freres, par ample depesche que je vous ay faicte ces jours passez, laquelle j’ay mise par quatre voyes dont j’estime que quelque une sera allée jusques à vous, vous aurez entendu la negociation de l’evesque de Valence avecques nos rebelles, comme elle a esté rompue sur l’impossibilité qu’ilz trouvent de laisser la ligue qu’ilz ont faicte avecques la Royne d’Angleterre ne pouvant retirer les hostaiges qu’ilz luy ont baillez, ensemble ce qui s’est passé depuis le partement dud. evesque, que les ennemys ont assailly petit Lict plus vifvement qu’ilz n’auroient ancores faict auparavant, et le vij^me de ce moys donné ung assault par tous les costez de la ville qui dura l’espace de deux grosses heures et demye fort furieux, dont ilz furent repoulsez avecques perte de six à sept cens hommes qu’ilz laisserent dans les fossez, sans ceulx qu’ilz emporterent morts et ung grand nombre de blessez. Et ancores que nos gens soient assieges de pres et environnez de fortz et de tranchées des ennemys, sy est ce qu’ilz font presque tous les jours quelque sortye sur eulx et en ont mis beaucoup en pieces, qui ne sont choses que je sache par ouy dire mais que je voy moy mesmes. J’estime que par la depesche que je vous ay faicte par mon aulmosnier vous aurez entendu comme ilz gaignerent la premiere tranchée que feirent lesd. ennemys / emporterent une enseigne de leurs plus utilles bandes et enleverent quatre ou cinq pieces, estans lesd. ennemys contrainctz publier qu’il n’y a poinct de plus braves hommes soubz le Ciel. Car ancores que depuis sept sepmaines qu’ilz sont devant ilz aient le loisir de faire tous les effortz qu’ilz ont voulu sans que personne les ayt empeschéz par dehors ny discommodez de vivres ny autres choses, si est ce qu’ilz n’y ont non plus davantaige qu’ilz avoient du premier jour sinon entant que les vivres de dedans ne sont consommez durant ce siege. Il y a du pain comme je vous ay escript jusques au xv^me de juing bien estroictement. Si le secours estoit arrivé il y a beaucoup de gens de bien par deça qui se seroient joinctz avecques nous et employé toute leur puissance qui n’osent bouger. Et voyant qu’il est si longtemps à venir entrent en grand soupson qu’il ne viendra poinct du tout, ou que sera apres que l’on les aura laissez perdre, qui seroit la plus grand [sic] honte qu’il advint jamais sans la perte des hommes qui peult estre vous seroit impossible d’en assembler ancores aultant pardelà de mesme [qualité que ? (words omitted)] eulx. Le tout gist en la dilligence et venue dud. secours, que je vous prie, Mess^rs mes freres, faire haster. Ces gens icy sont oppiniatres devant et attendent deux ou trois mil hommes d’Angleterre de renfort qui sera en tout sept ou huict mil hommes. Ilz mynent de deux ou troys costez, et ont resolu en leur conseil de faire ung parlement à leur poste le x^me de juillet pour contraindre tout le monde à suivre leur part, faisant courir le bruict / qu’ilz sont advertiz qu’il ne viendra secours de France devant le moys d’aoust, et qu’ilz sçavent bien qu’il n’y a vivres pour longtemps.

Au surplus vous verres ce que j’escriptz à la Royne pour le sr d’Erskyn et vous prie le faire gratiffier tant de l’abbaye de Cambuskynth et de ce qu’il demande pour son nepveu,Footnote ⁴⁹ et de l’estat d’Artus ErskinFootnote ⁵⁰ luy demeure. Cela servira beaucoup aux affaires de decà en ceste saison, oultre ce qu’il est à considerer que ma personne est entre ses mains. Du chasteau d’Edimbourg ce xxvj^me de may 1560.

Le cappitaine Chapperon que j’ay entendu que m’avez depesché a esté mis es mains des rebelles par des Angloys qui le conduisoient et ne sont les saufconduictz que donne la Royne d’Angleterre de passer par son pais qu’abbus et ung moien de faire prandre ceulx que vous envoyez pardecà. De quoy je n’ay voulu oublyer vous donner ancores advis par la presente afin que cy apres il ne s’en perde plus soubz telle asseurance. Et regardez de mectre voz depesches par autre voye. J’ay parcydevant escript à vous Mons^r le Cardinal pour l’expedition de l’abbaye de GlenluceFootnote ⁵¹ pour le comte de Cassalles que je vous prie faire depescher. Les rebelles se sont vantez que de huict jours en huict jours ilz ont advertissement de ce qui se faict en vostre conseil. Vous ferez bien de vous asseurer de Riguan CokburnFootnote ⁵² et le faire serrer en attendant l’arrivée devers vous de Mons^r de Valence / pour veriffier ce dont je l’ay oy parlé. Je vous ay aussi escript par ma susd. depesche qu’il m’a esté monstré la translation de mot à mot d’une de vos lettres du xix^me febvrier, que je receuz par trois divers endroictz, dont lesd. rebelles avoient eu une minutte devant que j’en eusse pas veu une, qui me faict croire qu’il y a quelque ung perdelà qui a maniment de ce qui s’escript au conseil qui donne ces advertissemens.

L’ambassadeur Throkmartin se mesle de suborner le monde, Escossoys et autres tant qu’il sera là, ancores qu’il fust bone [sic] paix vous n’en aures autre chose. Il a moyenné toute ceste rebellion.

Apres la venue des navires de la Royne d’Angleterre en ce Fyrth je baillay quelques lettres addressantes à nostre frere mons^r le Marquis à aucuns du long de la costre entre cy et ColinganFootnote ⁵³ afin que, si d’aventure il arrivoit, il fust adverty de ce qui estoit dedans led. Fyrth devant d’y entrer plus avant. Et luy mandoys par l’une que se voulant mectre en terre il seroit accompaigné seurement devers moy. Mais depuis estant l’armée de terre de lad. Royne dedans le pays, et se trouvans plusieurs contrainctz d’obtemperer aux rebelles, je n’ay voulu faillir vous donner advis que arrivant le secours pardecà il ne soit donné foy aud. lettres sinon entant que l’on verra sa commodité.

30. Marie de Lorraine to Francis II, 26 May 1560

Copy: AE, MD Angleterre 15, fo. 104v

Monsieur, le s^r d’Erskyn ayant demandé l’abbaye de Cambuskyneth qui est de longtemps vaccante par la mort du feu evesque de Rosse, pour en pourveoir M^r Adam Erskyn son nepveu, je ne puis moins faire veu la bonne volunté et affection en laquelle il continue tousiours de vous faire service que vous supplie comme je faiz treshumblement, Monsieur, l’en vouloir gratiffier et faire escripre en court de Rome pour l’expedition.Footnote ⁵⁴

31. Marie de Loraine to Mary queen of Scots, 26 May 1560

Copy: AE, MD Angleterre 15, fo. 104v–105r

Madame, le s^r d’Erskyn faict si bonne demonstration de sa fidelité et de l’envye qu’il a tousiours de faire service au Roy et à vous que je ne puis moins faire que vous en rendre tesmoignaige. Et afin qu’il cognoisse le bon gré que luy en sçavez je vous supplie treshumblement le gratiffier de l’abbaye de Cambuskynth qu’il demande et de la requeste qu’il m’a pryée vous faire retenir en vostre service Robert Erskyn son nepveu.

Aussi madame, Artus Erskyn son frere faict entendre que l’estat qu’il luy avoit esté donné a esté baillé à ung autre depuis son absence, et qu’ancores qu’il sache bien qu’il vous plaira le pourveoir d’un aussi honnorable ou meilleur, il luy semble que cestuy cy luy est le plus propre, et que luy estant osté il seroit soupsonné d’avoir commis quelque faulte. Ce qui me faict vous supplier treshumblement luy faire remectre et continuer sondict estat, estimant que celluy qui est en sa place se pourra contenter de ce que luy seroit baillé en recompense.

32. Marie de Lorraine to the duc de Guise and cardinal de Lorraine, Edinburgh castle, 28 May 1560

Copy: AE, MD Angleterre 15, fos 105r–106r

Messieurs mes freres, je vous ay ces jours passez faict plusieurs depesches bien amples par divers endroictz, dont je repeteray seulement par ceste cy le grand besoing qu’il y a de faire haster le secours, car le tout gist en la diligence, estans ces gens icy oppiniastrez devant Petit Lict, où quelques effectz qu’ilz aient faict jusques à ceste heure, ilz n’ont advantaige non plus que le premier jour qu’ilz arriverent, mais ont perdu beaucoup d’hommes tant en ung assault dont ilz ont esté repoulsez que aux sortyes que nos gens ont faict sur eulx. Il y a du pain jusques au xv^me de juing bien estroictement comme je vous ay mandé, et à la contenance des ennemys qui ont ceint toute la ville de fortz et de tranchées, il semble qu’ilz la veulent avoir par la fain, et ce pendant mynent par deux ou trois costez. Et font courir le bruict qu’ilz attendent cinq mil hommes d’Angleterre qui leur doibvent venir de renfort. Il y a deux jours qu’ilz voulurent faire descente en l’isle, où ilz confessent avoir perdu quatre vingts ou cent hommes. Nos rebelles feirent hier en ceste ville proclamer ung parlement au xv^me de juillet / et disent que le secours ne viendra devant le mois d’aoust et se sont vantez que de huict jours en huict jours ilz ont advertissement de ce qui se faict en vostre conseil. Je vous ay escript par mes precedentes depesches qu’il m’a esté monstré une translation faicte de mot à mot d’une lettre que m’escrivies du xix^me febvrier dont les rebelles avoient eu une minutte devant que je receusse vostred. lettre. Il fault que cela fust venu de quelque ung qui a maniment de ce qui s’escript au conseil. L’ambassadeur Trokmartin suborne tout le monde Escossoys et autres tant qu’il sera pardelà. Vous n’en aurez autre chose ancores qu’il fust bonne paix. Il a moienné toute ceste rebellion. Il ne fault plus envoyer parsonne par Angleterre soubz l’asseurance des saufconduictz que baille la Royne sa maistresse, par le moien desquelz tous ceulx que vous depeschez pardeça sont menez aux rebelles par les Angloys mesmes qui les conduisent et faictz leurs prisonniers, comme il est ancores advenu dernierement du cappitaine Chapperon qui est entre les mains du duc de Chastellerault. Je ne veulx aussi faillir à vous donner advis que apres la venue des navires de la Royne d’Angleterre en ce Fyrth je baillay quelques lettres addressantes à nostre frere mons^r le marquis à aucuns du long de la coste entre cy et Coldingan, afin que si d’aventure il arrivoit / il fust adverty de ce qui estoit dedans led. Fyrth devant qu’il entre plus advant. Et luy mandoys par une, que se voulant mectre à terre il seroit seulement accompaigné devers moy. Mais depuis estant l’armée de terre de lad. Royne dans le pais et plusieurs contrainctz obtemperes aux rebelles, il ne sera besoing donner foy ou credyt à ceulx qui pourroient à l’arrivée du secours presenter les susd. lettres de vieille datte sinon en tant que l’on verra la commodité apparente. Ce porteur est homme de bien et vous dira l’estat en quoy il a laissé les choses.

33. Reply of Francis II on the ratification, 15 September 1560Footnote ⁵⁵

Copy: TNA, SP 70/18, fo. 59 (CSPF, III, no. 526)

L’ambassadeur de la Royne d’Angleterre resident en France estant venu de la part de lad. dame requerir les Roy et Royne de la ratiffication du traicté dernierement faict en Escosse entre les depputez de leurs majestez et ceulx de sad. maistresse, a eu pour responce par la bouche de Monsieur le Chancellier, ce qui s’ensuyt :

Que, ayant esté consideré par le Conseil de leursd. majestez ce qui est passé oud. pays d’Escosse, il se trouve qu’il y a deux traictez tous deux du vj^me de juillet dernier, le premier faict avecques la noblesse et peuple d’Escosse par lequel lesd. Escossoys promectent aux premiers Estatz qui se devoyent commancer le dix^me de juillet ensuyvant, eslire et depputer certains bons et notables personnaiges d’entre eulx, pour venir prester l’obeissance qu’ilz doyvent à leur Roy et Royne, et traicter des affaires dud. pays ; l’autre faict avecques des depputez de lad. dame Royne d’Angleterre sa maistresse par lequel est convenu, que les Roy et Royne observeront et accompliront toutes les choses par leurs depputez octroyees à lad. noblesse et peuple d’Escosse par led. premier traicté faict avcques eulx led. vj^me juillet, pourveu que lesd. Escossoys accomplissent les conventions et articles d’icelluy de leur part.

Par ainsi, qu’il sembloit raisonnable et estoit necessaire pour garder l’ordre que lesd. Escossoys facent de leur part premierement ce qu’ilz sont tenuz et ont promis, ce qu’ilz n’ont encores faict, ne envoyé devers leurs majestez, qui jusques icy les ont actendu et actendent en intention de les recevoir aussi benignement qu’ilz feront (comme ilz esperent) ce qu’ilz doyvent.

Qu’il n’y auroit poinct d’apparence jusques à ce que leursd. majestez ayent veu et congneu en quel devoir se mectent lesd. Escossoys, que la ratiffication dud. dernier traicté se feist, puis qu’il porte obligation envers lad. dame sa maistresse qui regarde et concerne ainsi lesd. Escossoys et en leur faveur accomplissant ce qu’ilz ont promis et non autrement. Et ne seroit raisonnable que leurs deux majestez demourassent en suspend et incertainetté, de l’intention d’iceulx Escossoys, et que eulx fussent asseurez par lad. ratiffication de ce qui leur touche, comme le Roy s’asseure que lad. dame Royne d’Angleterre y ayant bien pensé, le trouverra digne de consideration et le prendra en bonne part, croyant si luy plaist, que ce que leurs majestez en font n’est pas pour delayer, ne en intention qu’ilz ayent de mectre le moindre scrupulle du monde en la bonne paix et amytié qu’ilz ont tousiours desiré et desirent garder et entretenir avecques tous les bons respectz, et dignes offices convenables à la faire perpetuellement durer, et de passer toutes les choses qui jamais pourront survenir entre eulx, par la doulce voye, et comme il appartient entre princes si amys et si prochainement alliez. Ne aussi, qu’ilz ayent aucune volunté d’eulx depporter envers lesd. Escossoys leurs subgectz, synon benignement et humainement, oublyant (comme ilz ont desia faict) toutes choses passees, faisant par eulx à l’advenir ce que bons et loyaulx subgectz doyvent à leurs souverains, ainsi que le Roy et la Royne s’asseurent que lad. dame Royne d’Angleterre sçayt qu’il est juste et raisonnable et a tousiours faict dire à leurs majestez qu’elle le desire ainsi.

34. Francis II to Elizabeth I, Saint-Germain-en-Laye, 17 September 1560Footnote ⁵⁶

Original: TNA, SP 70/18, fo. 65 (CSPF, III, no. 528)

Treshault et tresexcellente princesse nostre treschere et tresamee seur et cousine, salut. Nous avons receu du s^r de Trokmarthon vostre ambassadeur residant pres de nous, la lettre que nous avez escripte du xxvij^me du passé, suyvant laquelle, il nous a parlé de vostre part de la ratiffication du traicté dernierement faict en Escosse par noz depputez. Enquoy il vous pourra bien faire entendre par la responce que luy avons faicte de quelle volunté il nous a trouvé et l’intention bonne que nous avons à l’entretenement et observation des choses qui touchent et regardent la bonne paix, amytié et sincere intelligence que nous desirons veoir perpetuellement durer entre nous ; et aussi l’occasion qui a retardé lad. ratiffication, laquelle nous estimons vous trouverez si pertinente que vous la prendrez en bonne part, ainsi que nous vous pryons faire et croyre de cueur et affection envers vous, ce que vous sçaviez desirer de vostre meilleur frere et amy, qui prye Dieu, Treshaulte et tresexcellente princesse nostre treschere et tresamée seur et cousine, vous avoir en sa tressaincte et digne garde. Escript à St Germain en Laye le xvij^e jour de septembre 1560.

Vostre confrere et cousin,

FRANCOYS,

De Laubespine.

35. Charles IX to Elizabeth I, Fontainebleau, 20 February 1560/1561

Original: TNA, SP 70/23, fo. 100

Treshaulte, tresexcellente princesse nostre treschere seur et cousine, salut. Le bon office que a faict de vostre part envers nous le Conte de Bedfort conseiller en vostre conseil estroit present porteur et les honnestes et amyables propoz que luy et vostre ambassadeur residant pres de nous, nous ont tenuz, nous font congnoistre combien est grande et sincere vostre affection en nostre endroict et le desir que vous avez de continuer l’amytié et parfaicte alliance qui a esté entre le feu Roy nostre treshonoré seigneur et père de tres louable memoire et vous, chose qui nous a esté grandement agreable pour la trouver consonnante à l’intention que nous avons tousjours eue d’en user ainsi envers vous. Dont nous vous prions tresaffectueusement estre asseuree, et croyre que tout ce que nous pourrons penser pour faire durer et corroborer ceste si chere amytié, tant convenable au bien commun de nous, noz royaumes, pays et subgectz, nous vous en rendrons tesmoignage par si bons effectz, que vous en recevrez non moindre contantement que nous avons d’entendre vostre si parfaicte et droicte volunté, ainsi que l’avons plus avant declaré aud. Conte de Bedfort, sur lequel nous remectans du surplus, nous prions dieu Treshaulte et Tresexcellente princesse nostre treschere et tresamee bonne seur et cousine, vous avoir en a tresaincte et digne garde. Escript à Fontainebleau le xx^e jour de fevrier 1560.

Vostre bon frere et cousin,

CHARLES,

De Laubespine.

36. Catherine de Medici to Elizabeth I, Fontainebleau, 20 February 1561

Original en placard: TNA, SP 70/23, fo. 102

Printed (with errors): LCM, I, p. 170

Tres haulte et tres excellente princesse nostre tres chere et tres amee bonne seur et cousine, salut: du conte de Betford, conseiller en vostre conseil privé present porteur, nous avons receu vostre lectre et entendu tant et de si bons honnestes propos de vostre part touchant le desir que vous avez à la continuation et augmentation de l’amitié et alliance, qui est de long temps entre ceste couronne et la vostre, que nous en avons eu singulier contentement, vous asseurant que c’est une des choses de ce monde que plus nous desirons et à quoy vous congnoistrez par les effectz que nous employerons tous les bons offices y convenables, dont nous vous pryons estre certaine et que vous recepvrez ceste correspondance de nostre affection en cest endroict que vous en aurez parfaicte satisfaction, comme plus long l’avons dict aud. conte, auquel nous nous remectons et du surplus que sur ce vous pourrions escrire, pryant Dieu, tres haulte et tres excellente princesse, nostre tres chere et tres amee bonne seur et cousine, vous avoir en sa tressaincte et digne garde. Escript à Fontainebleau, le xx^e jour de fevrier 1560.

Vre bonne seur et cousine,

CATERINE,

De Laubespine.

37. Antoine de Bourbon, king of Navarre, to Elizabeth I, 20 February 1561

Original: TNA, SP 70/23, fo. 104

Summary: CSPF, III, no. 102, p. 555

Treshaulte, tresexcellent et tresvertuese princesse, nostre treschere et treshonnoree bonne seur et cousine, nous presentons à vostre bonne grace noz recommandations humbles et affectueuses. Nous avons receu par mons^r le Comte de Bethfort les lettres qu’il vous a pleu nous escrireFootnote ⁵⁷ desquelles et de tous les honnestes propos qui nous a tenuz de vostre part et la sincere affection que vous avez à l’union et conservation de la paix de ces deux royaulmes, nous luy avons faict telle declaration suivant que au semblable nous congnoissons de ce costé la volunté du Roy monseigneur et de la Royne sa mere y estre disposé qui ne nous sera jamais malaisé d’y aider et tenir la main. A quoy nous vous supplions estre asseuree que nous ferons tous les bons et vertueux offices qui seront dignes du lieu que nous tenons, et que en toute particularité que nous aurons moien de vous servir et complaire vous ne trouverez parent ny allié en ce royaulme qui de plus entiere affection s’y emploie que nous, ainsi que nous avons prié led. s^r Conte vous faire entendre de bouche de nostre part, qui nous gardera de vous faire ceste lettre plus longue, priant Dieu, Treshaulte, Tresexcellent et tresvertueuse princesse, vous donner treslongue et tresheureuse vye. Escrit à Fontainebleau ce vingt^me jour de febvrier 1560.

Vostre humble et hobeissant frere à vous faire servisce,

ANTOINE.

38. Anne de Montmorency to Elizabeth I, Fontainebleau, 20 February 1560/1561

Original: TNA, SP 70/23, fo. 110

Madame, j’ay receu la lettre qu’il vous a pleu m’escrire par Mons^r le Conte de Bedfort, et ne vous sçaurois assez treshumblement remercier de l’honneur qu’il vous plaist me faire de me faire visiter de vostre part et de l’amytié et bonne affection que vous avez en mon endroict, vous suppliant croire, Madame, qu’il n’y a gentilhomme en ce royaulme, qui desire plus que moy de faire tous les bons offices qui seront en ma puissance de maintenir et conserver l’amitié qui est entre le Roy et vous, et y tiendray la main tant qu’il me sera possible et que dieu me fera la grace de vivre, affin que les subiectz de voz pais vivent en paix et tranquilité. Vous pouvant bien asseurer, Madame, que si dieu nous a voulu oster nostre Roy, qu’il nous a donné ung aussy gentil prince et amateur de vertu, qu’on en sçauroit desirer, et qui promect autant de luy comme vous pourrez entendre plus au long dud. s^r conte de Bedfort, vous suppliant treshumblement, madame, croire que je me sentirois tresheureulx sy vous pouvois faire service agreable pardeça, là où je m’emploierois d’aussi grande volonté, que je me recommande tant et si treshumblement comme je puis à vostre bonne grace, suppliant nostre seigneur,

Madame, vous donner en santé tresbonne, heureuse et longue vye. De Fontainebleau ce xx^me jour de fevrier 1560.

Vre treshumble et tres hobeysant servyteur,

MONTMORENCY.

39. The duc de Guise to Elizabeth I, Fontainebleau, 26 February 1560/1561

Original: TNA, SP 70/23, fo. 131

Madame, de Mons^r le Conte de Betfort j’ay receu la lettre que vous a pleu m’escripre, et entendu les honnestes propoz qu’il m’a tenuz de vostre part, dont je vous mercie treshumblement et de la fiance que vous avez de mon intention et affection au bien de l’amytié et bonne intelligence qui est entre la magesté du Roy et la vostre. A quoy vous trouverez Monsieur le Cardinal de Lorraine mon frere et moy tousjours bien disposez, ayant bien voullu en son absence et respondant pour nous deux à ce qu’il vous a pleu aussi luy en escripre, vous en asseurer comme de moymesmes, qui prie dieu, Madame, vous donner en perfaicte sainté tresbonne et treslongue vye. De Fontainebleau le xxvj^me fevrier 1560.

D V M^te,

treshumble et tresobeissant serviteur,

FRANCOYS DE LORRAINE.

40. Charles IX to Elizabeth I, Fontainebleau, 26 April 1561

Original: TNA, SP 70/25, fo. 102

Treshaulte, tresexcellente princesse nostre treschere soeur et cousine, salut. Ayant entendu par ce que le s^r de Seure nostre conseiller et ambassadeur pres de vous nous a escript, que vous mectez en quelque doubte ce qu’il negotie de nostre part pour ne vous avoir escript depuis nostre advenement à ceste nostre couronne que nous le continuons là nostre ambassadeur, ce que nous avoit semblé peu necessaire pour estre chose que jusques icy ne fut entre les autres princes jamaiz mise en aucune difficulté. Et toutesfois pour vous satisfaire en ceste endroict vous prions tresaffectueusement le voulloir avoir agreable et le croyre de ce qu’il vous dira de par nous et negotiera de nostre part tout ainsy que vous feriez nous mesmes, ayant commandement expres de ne faire aultre office sinon tendant à l’entretenement, continuation et fortiffication de nostre mutuelle amytié comme il vous dira. Priant à tant Treshaulte et tresexcellente Princesse nostre treschere et tresamee seur et cousine vous avoir en sa tressaincte et digne garde. Escript à Fontainebleau le xxvj^e jour d’apvril 1561.

Vostre bon frere et cousin,

CHARLES,

De Laubespine.

41. Elizabeth I to Charles IX, 14 July 1561

Draft: TNA, SP 70/28, fo. 44

Treshault etc. nostre trescher et tresaymé bon frere etc salut et fraternelle dilection. Nous avons receu voz lettres par les mains de s^r d’Oysel gentilhomme de voustre chambre et chevalier d’honneur de nostres treschere et tresaymee bonne seur et cousine la Royne d’Escosse que la dicte royne ayant intention de repasser dedans peu de temps en son royaume d’Escosse avoit trouvé pour causes alleguez en voustred. lettres, nous mouvoir à voulloir faire expedier toutes les honnestes et favorables lettres qui appartiendoient à la facilité et seureté de son passage. Pour responce à lesquellez voz lettres il m’a semblé bon de vous advertir, nostres treschere et tresaymé bon frere et cousin, que si comme en toutes choses convenables nous trouverons toutzjours preste à vous faire toute honneur et playsir appertenentz à l’amytié et bonne alence qui est entre nous, ainsy pour ce que à la venue dud. sr d’Oysel nous attendions asseurement d’entendre par luy nouvelles de quelque bonne et finalle resolutyon de la parte de noustred. treschere et tresaymee bonne seur et cousine touchant l’aprouvance de certaines choses à l’assurance et confirmation des lesquelles elle est tenue et obligee, dont toutesfoys à noustre grande regret il ne nous avion sceu certaynement dire, il nous a semblé convenable sentant noustre expectacion du tout frustrer le retourner vers noustred. treschier et tresaymee bonne seur et cousine avec telle messages responce que de raison la d[e]vra contenter et satisfaire ainsi comme par mons^r ambassadeur resident en vostre court vous sera plus amplement declarer, auquel vous prions noustre treschier etc. voulloir adiouster la mesme foy que feriez à noustre propre personne. A tant etc. Escript à Londres le xiiii^e jour de juillet 1561.

42. The duc de Guise to Elizabeth I, Corbeil, 27 March 1561/1562Footnote ⁵⁸

Original: TNA, SP 70/24, fo. 60

Copy: CSPF, IV, no. 70, p. 38 (calendared as March 1561)

Madame, j’ay parcidevant au rapport de mons^r le Grant prieur mon frère et encores dernierement par celluy de mon frere, mons^r le marquis, et par le tesmoignaige mesmes de mons^r vostre ambassadeur estant pardeça et oultre la demonstration qu’il a pleu à vostre magesté d’en faire à mesd. freres et l’honneur qu’ilz en ont de vostre grace tousiours receuz passans par vostre royaume,Footnote ⁵⁹ entendu tant de bons et honnorables propoz que vostred. magesté ordinairement a tenuz à l’avantaige de monsieur mon frere, mons^r le Cardinal de Lorraine, et moy, que ce m’est par là ample declaration de la bonne amytié et voulunté bien affectionnee que vostred. magesté porte non seullement à l’endroict de la Royne d’Escosse douairiere de France, Madame ma nyepce et vostre bonne seur et cousine, mais encores envers toutte nostre maison. Surquoy je ne doibz differer, Madame, vous advertir que nous recognoissans tous une si grande faveur d’une bonté infinye qui est en vous et m’appercoye fort bien que mad. dame et nyepce a tresgrande occasion de s’en louer et tenir contente autant comme elle faict par ce qu’elle m’en a faict sçavoir, desirans ne pouvoir faire moings cognoistre de son costé par quelzques bons effectz l’affection que pareillement elle vous porte. Quant à moy, Madame, je vous en ay telle obligation que je recepveray tousiours à tresgrand heur le moyen que j’auray jamais de vous faire aussi treshumble service comme je desire quelque occasion que s’en puisse presenter, reservé le debvoir que je doibz au Roy mon souverain, ainsi que j’en ay plus au long discouru avec mond. s^r vostred. ambassadeur les bons et honnestes offices duquel et qu’il a par vostre commandement usez envers moy, me donnant tousiours asseurance, Madame, qu’il vous en sçaura rendre tresbon compte, qui me fera sur ce faire fin s’il vous plaist, de mes treshumbles recommandations à vostre bonne grace.

Madame je prye nostre seigneur vous donner en toute santé et prosperité treslongue vye. Escript à Corbeil le xxvij^e jour de mars 1561.

D V M^te,

Treshumble et tresobeissant serviteur,

FRANCOYS DE LORRAINE.